ನಿಮ್ಮ ಮನಸ್ಸಿನ ಬಗ್ಗೆ ನಿಮಗೆಷ್ಟು ಗೊತ್ತು? | ರೋಗದ ಭಯ; ಏನಿದು ವಿಚಿತ್ರ ಕಾಯಿಲೆ?

ಪದೇಪದೆ 'ನನಗೆ ಹೃದಯ ರೋಗವಿರಬಹುದು' ಎಂದು ಹರೀಶ್ ನಂಬಿದರು. ಇಸಿಜಿಯಿಂದ ಗೊತ್ತಾಗದಂತಹ ಸಮಸ್ಯೆ ಇರಬಹುದು ಎಂದು ಆತಂಕಗೊಂಡರು. ನಿದ್ರೆ ಕಡಿಮೆಯಾಯಿತು. ಇಂಟರ್ನೆಟ್‌ನಲ್ಲಿ ಪದೇಪದೆ ಗೂಗಲ್ ಮಾಡಿ, ಹೃದಯ ರೋಗದ ಲಕ್ಷಣಗಳ ಬಗ್ಗೆ ಓದತೊಡಗಿದರು. ಮನೆಯಲ್ಲಿ ಹೆಂಡತಿ, ಮಕ್ಕಳು ಗಾಬರಿಗೊಂಡರು. ಮುಂದೇನಾಯ್ತು?

ನಲವತ್ತೈದು ವರ್ಷದ ಬ್ಯಾಂಕ್ ಅಧಿಕಾರಿ ಹರೀಶ್ ಬೆಂಗಳೂರಿನ ನನ್ನ ಮಿತ್ರ ಹೃದಯರೋಗ ತಜ್ಞರೊಬ್ಬರಿಂದ ಒಂದು ಕಾಗದ ಹಿಡಿದುಕೊಂಡು ಬಂದಿದ್ದರು. "ಇವರು ಬೆಂಗಳೂರಿನವರೆಗೆ ನನ್ನನ್ನು ಹುಡುಕಿಕೊಂಡು ಬಂದಿದ್ದಾರೆ. ಆದರೆ, ಇವರಿಗೆ ಅಗತ್ಯವಿರುವುದು ನಿನ್ನ ಸಹಾಯ," ಎಂಬುದು ಈ ಕಾಗದದ ಸಾರಾಂಶ.

ಹರೀಶ್ ಹತ್ತಿರ ಮಾತನಾಡಿದಾಗ ತಿಳಿದುಬಂದ ವಿಷಯ ಇಷ್ಟೆ: ಅವರಿಗೆ ಎರಡು ವರ್ಷಗಳ ಹಿಂದೆ ಸಕ್ಕರೆ ಕಾಯಿಲೆ ಇದೆ ಎಂಬುದು ಗೊತ್ತಾಯಿತು. ಸಕ್ಕರೆ ಕಾಯಿಲೆಯ ನಿಯಂತ್ರಣಕ್ಕಾಗಿ ಸಾಕಷ್ಟು ಮಾತ್ರೆಗಳು, ಆಹಾರದಲ್ಲಿ ಬದಲಾವಣೆ, ನಿತ್ಯವೂ ಒಂದು ಗಂಟೆ ವಾಕಿಂಗ್ ಮಾಡುತ್ತಿದ್ದರು. ಎರಡು ತಿಂಗಳ ಹಿಂದೆ ಕನ್ನಡ ಪತ್ರಿಕೆಯೊಂದನ್ನು ಓದುತ್ತಿದ್ದಾಗ ಆರೋಗ್ಯ ಮಾಹಿತಿ ಅಂಕಣವೊಂದರಲ್ಲಿ  ಹೃದಯ ರೋಗದ ಬಗ್ಗೆ ಓದಿದರು. ಈ ಹೃದಯ ರೋಗ ಅನ್ನುವುದು ಸಕ್ಕರೆ ಕಾಯಿಲೆ ಇರುವವರಲ್ಲಿ ಬಹಳಷ್ಟು ಸಾಮಾನ್ಯ ಎಂಬ ವಿಷಯ ಬಾಕ್ಸ್‌ ಐಟಮ್ (ವಿಶೇಷ ಪ್ರಾತಿನಿಧ್ಯದ ವಿಷಯ) ಆಗಿತ್ತು. ಸಕ್ಕರೆ ಕಾಯಿಲೆ ಇರುವಾಗ ಹೃದಯಾಘಾತ ಬಂದರೂ ಗೊತ್ತಾಗುವುದಿಲ್ಲ ಎಂಬ ವಿಷಯವನ್ನು ಎರಡು-ಮೂರು ಕಡೆ ಬರೆದಿದ್ದರು. ಹೃದಯಾಘಾತದ ಚಿಹ್ನೆಗಳ ಬಗ್ಗೆ ಬರೆಯುತ್ತ, ಎಡ ಕೈ ಹತ್ತಿರ ನೋವು ಕಾಣಿಸಿಕೊಳ್ಳಬಹುದು, ಹೃದಯ ಬಡಿತ ಹೆಚ್ಚಾಗಬಹುದು ಎಂಬುದನ್ನು ಕೂಡ ಬರೆದಿದ್ದರು. ಇದನ್ನು ಓದಿದ ಹರೀಶ್, ತಮ್ಮ ದೇಹದ ಸಮಸ್ಯೆಗಳತ್ತ ಗಾಢವಾಗಿ ಯೋಚನೆ ಮಾಡಲು ಪ್ರಾರಂಭಿಸಿದರು.

ಬ್ಯಾಂಕಿನಲ್ಲಿ ಇನ್ಸ್‌ಪೆಕ್ಷನ್ ಬೇರೆ ನಡೆಯುತ್ತ ಇತ್ತು. ದೊಡ್ಡ-ದೊಡ್ಡ ಫೈಲ್‌ಗಳನ್ನು ಎತ್ತಿಕೊಂಡು ಮನೆಗೆ ಬರುತ್ತಿದ್ದರು. ಕೆಲಸದ ಒತ್ತಡದಿಂದ ರಾತ್ರಿ ನಿದ್ದೆಯೇ ಬರುತ್ತಿರಲಿಲ್ಲ. ಅದೇ ಸಮಯದಲ್ಲಿ ಇವರಿಗೆ ಈ ಪತ್ರಿಕೆಯ ಲೇಖನ ಪದೇಪದೆ ಮನಸ್ಸನ್ನು ಕಾಡತೊಡಗಿತು. ತಮ್ಮ ಸಕ್ಕರೆ ಕಾಯಿಲೆಗೆ ಮಾತ್ರೆ ನೀಡುತ್ತಿದ್ದ ಕುಟುಂಬ ವೈದ್ಯರ ಹತ್ತಿರ ಹೋಗಿ, ತಮ್ಮ ಸಮಸ್ಯೆಗಳನ್ನು ಹೇಳಿದರು. ಕುಟುಂಬ ವೈದ್ಯರು ಪರಿಚಯವಿರುವ ಫಿಸಿಷಿಯನ್ ಒಬ್ಬರ ಹತ್ತಿರ ಕಳಿಸಿದರು. ಬಹಳ ಹೊತ್ತು ಪರೀಕ್ಷೆ ಮಾಡಿದ ಫಿಸಿಷಿಯನ್, ಹರೀಶ್‌ಗೆ ಒಂದು ಇಸಿಜಿ ಮಾಡಿಸಲು ಹೇಳಿದರು. ಇಸಿಜಿಯಲ್ಲಿ ಏನೂ ಸಮಸ್ಯೆ ಇಲ್ಲ ಎನ್ನುವುದನ್ನು ತಿಳಿಸಿದರು. ಹರೀಶ್‌ಗೆ ಸ್ವಲ್ಪ ಸಮಾಧಾನವಾಯಿತು. ಮನೆಗೆ ಹೋದರು. ತಮ್ಮ ಹಲವು ಮಿತ್ರರಿಗೆ ಫೋನ್ ಮಾಡಿ, ತಮ್ಮ ಸಮಸ್ಯೆಯ ಬಗ್ಗೆ ಮತ್ತು ಅದು ಪರಿಹಾರವಾದ ಬಗ್ಗೆ ಹೇಳಿದರು.

Image

ಕೆಲವೊಮ್ಮೆ ಕೆಲವು ಮಿತ್ರರು ಅತಿಯಾದ ಕಾಳಜಿ ಇದೆ ಎಂದು ತೋರಿಸಲು ಹೋಗಿ ಕೆಲವು ಸಮಸ್ಯೆಗಳನ್ನು ತಂದು ಒಡ್ಡುತ್ತಾರೆ. ಹಾಗೆಯೇ, ಕಿರಣ್ ಎಂಬ ಒಬ್ಬ ಮಿತ್ರ, "ಇಸಿಜಿಯಿಂದ ಏನೂ ಗೊತ್ತಾಗುವುದಿಲ್ಲ. ಹಲವೊಮ್ಮೆ ಹೃದಯಾಘಾತಗಳು ಅದರಲ್ಲೂ, ಡಯಾಬಿಟಿಸ್ ಇರುವವರಿಗೆ ಸೈಲೆಂಟಾಗಿ ಆಗುತ್ತವೆ. ಹೃದಯ ರೋಗ ತಜ್ಞರೊಬ್ಬರ ಸಲಹೆ ಪಡೆಯುವುದು ಒಳ್ಳೆಯದು," ಎಂದು ತಲೆಯಲ್ಲಿ ಒಂದು ಹುಳ ಬಿಟ್ಟರು.

ಹರೀಶರಿಗೆ ಮತ್ತೊಮ್ಮೆ ಎಡ ಕೈಯಲ್ಲಿ ನೋವು, ಎದೆ ಬಡಬಡ ಹೊಡೆದುಕೊಳ್ಳಲು ಶುರುವಾಯಿತು. ಎರಡು ದಿನ ಬಿಟ್ಟು ಹತ್ತಿರದ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಗೆ ಹೋಗಿ ಹೃದಯ ರೋಗ ತಜ್ಞರನ್ನು ಭೇಟಿಯಾದರು. ಹೃದಯರೋಗ ತಜ್ಞರು ಇಸಿಜಿ ಗಮನಿಸಿದ್ದರು ಮತ್ತು ಇವರ ಮನಸ್ಸಿನಲ್ಲಿರುವ ಹೆದರಿಕೆಯನ್ನು ಗಮನಿಸಿ, 'ಸ್ಟ್ರೆಸ್ ಟೆಸ್ಟ್' ಎಂಬ ಪರೀಕ್ಷೆಯೊಂದನ್ನು ಮಾಡಲು ಹೇಳಿದರು. ಸ್ಟ್ರೆಸ್ ಟೆಸ್ಟ್ ಎಂದರೆ, ನಾವು ಜಿಮ್‌ನಲ್ಲಿ ನೋಡುವ ಟ್ರೆಡ್ ಮಿಲ್ ತರಹದ ಒಂದು ಯಂತ್ರದ ಮೇಲೆ ಓಡುವುದು. ಆ ಸಮಯದಲ್ಲಿ ಇಸಿಜಿ ಮಾಡುತ್ತಾರೆ. ಓಡುವಾಗ ಹೃದಯಕ್ಕೆ ಒತ್ತಡವಾಗುತ್ತದೆ; ಆ ಒತ್ತಡದಿಂದ ಇಸಿಜಿಯಲ್ಲಿ ಏನಾದರೂ ಬದಲಾವಣೆಗಳು ಆಗುತ್ತವೆಯೇ ನೋಡುವುದು ಸ್ಟ್ರೆಸ್ ಟೆಸ್ಟ್ ಉದ್ದೇಶ. ಇದು ಕೂಡ ಸರಿಯಾಗಿದೆ ಎಂದು ಹೃದಯರೋಗ ತಜ್ಞರು ತಿಳಿಸಿದರು.

ಒತ್ತಡದಲ್ಲಿದ್ದಾಗ ಒಮ್ಮೊಮ್ಮೆ ತಲೆಯೊಳಗೆ ಏನಾದರೂ ವಿಷಯ ಹೋಯಿತೆಂದರೆ ಮುಗಿಯಿತು - ಏನು ಮಾಡಿದರೂ ಅದು ಹೊರಗೆ ಹೋಗುವುದಿಲ್ಲ. ಪದೇಪದೆ 'ತನಗೆ ಹೃದಯ ರೋಗವಿರಬಹುದು, ಇಸಿಜಿ ಸ್ಟ್ರೆಸ್ ಟೆಸ್ಟ್‌ನಿಂದ ಗೊತ್ತಾಗದಂತಹ ಸಮಸ್ಯೆ ಇರಬಹುದು' ಎಂಬ ಯೋಚನೆಗಳು ಹರೀಶರ ತಲೆಯಲ್ಲಿ ಬರತೊಡಗಿತು. ನಿದ್ರೆ ಕಡಿಮೆಯಾಗಿತ್ತು. ಇಂಟರ್ನೆಟ್‌ನಲ್ಲಿ ಪದೇಪದೆ ಗೂಗಲ್ ಮಾಡಿ, ಹೃದಯ ರೋಗದ ಲಕ್ಷಣಗಳ ಬಗ್ಗೆ ಓದತೊಡಗಿದರು. ಮನೆಯಲ್ಲಿ ಹೆಂಡತಿ ಮತ್ತು ಮಕ್ಕಳು ಗಾಬರಿಗೊಂಡರು. ಹತ್ತಿರದ ಸಂಬಂಧಿಕರೊಬ್ಬರು, ಬೆಂಗಳೂರಿನ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತ ಇರುವುದರಿಂದ ಸಲಹೆ ಪಡೆಯಲು ಬೆಂಗಳೂರಿಗೆ ಹೋಗಲು ನಿರ್ಧರಿಸಿದ್ದರು. ಅಲ್ಲಿ ನನ್ನ ಮಿತ್ರ-ಹೃದಯ ರೋಗ ತಜ್ಞರನ್ನು ಅವರನ್ನು ಭೇಟಿಯಾದರು.

ಈ ಲೇಖನ ಓದಿದ್ದೀರಾ?: ನಮ್ಮ ಪ್ರೀತಿಪಾತ್ರರ ಆತ್ಮಹತ್ಯೆ ತಡೆಯಲು ನಾವು ಮಾಡಬಹುದಾದ್ದು ಏನು? ಇಲ್ಲಿವೆ ಕೆಲವು ಸಲಹೆ

ಹರೀಶರ ಇಸಿಜಿ ಮತ್ತು ಸ್ಟ್ರೆಸ್ ಟೆಸ್ಟ್ ಗಮನಿಸಿದ ಡಾಕ್ಟರ್, ಕೆಲವು ಪರೀಕ್ಷೆಗಳನ್ನು ಮಾಡಲು ಹೇಳಿದರು. ಈ ಎಲ್ಲ ಪರಿಕ್ಷೆಗಳು ಸರಿ ಇದ್ದುದನ್ನು ನೋಡಿ, ಹರೀಶರೊಂದಿಗೆ ಬಹಳಷ್ಟು ಹೊತ್ತು ಮಾತನಾಡಿ ತಿಳಿ ಹೇಳಿದರು. ಆದರೂ ಹರೀಶ್ ಕೇಳುವ ಪರಿಸ್ಥಿತಿಯಲ್ಲಿ ಇರಲಿಲ್ಲ. ಗೂಗಲ್‌ನಲ್ಲಿ ಅವರು ಓದಿದ್ದು ಏನೆಂದರೆ, ಹೃದಯದ ಕಾಯಿಲೆಯ ಬಗ್ಗೆ ತಿಳಿದುಕೊಳ್ಳಲು ಮಾಡಬೇಕಾದ ದೊಡ್ಡ ಪರೀಕ್ಷೆ ಎಂದರೆ 'ಆಂಜಿಯೊ ಗ್ರಾಮ್' - ಅದನ್ನು ಮಾಡಿಯೇ ತೀರಬೇಕು ಎಂದು ಪಟ್ಟು ಹಿಡಿದರು. ವೈದ್ಯರು ಎಷ್ಟೇ ಹೇಳಿದರೂ ತಿಳಿದುಕೊಳ್ಳುವ ಮನಸ್ಥಿತಿಯಲ್ಲಿ ಹರೀಶ್ ಇರಲಿಲ್ಲ. ಕೊನೆಗೆ, ಅವರ ಸಂಬಂಧಿಕರು ಮತ್ತು ಹೆಂಡತಿಯನ್ನು ಕರೆದು ಈ ಕಾಗದವನ್ನು ಬರೆದು ಅವರ ಹತ್ತಿರ ಕೊಟ್ಟು ನನ್ನನ್ನು ಭೇಟಿಯಾಗಲು ತಿಳಿಸಿದರು. ಒಂದು ತಿಂಗಳವರೆಗೆ ಕೆಲವು ಮಾತ್ರೆಗಳನ್ನು ಕೊಟ್ಟು, ಮುಂದಿನ ತಿಂಗಳು ಆಂಜಿಯೋ ಗ್ರಾಮ್ ಮಾಡುವುದು ಎಂದು ಹೇಳಿ ಕಳಿಸಿದರು. ಮನಸ್ಸಿಲ್ಲದ ಮನಸ್ಸಿನಲ್ಲಿ ಹರೀಶ್ ಮತ್ತು ಮನೆಯವರು ಉಡುಪಿಗೆ ವಾಪಸ್ ಬಂದರು.

ಹರೀಶರೊಂದಿಗೆ ನಾನು ಮಾತನಾಡಿದಾಗ ತಿಳಿದುಬಂದದ್ದೇನೆಂದರೆ, ಅವರಿಗೆ ಬ್ಯಾಂಕಿನ ಒತ್ತಡ ಮತ್ತು ಡಯಾಬಿಟಿಸ್ ರೋಗದ ಕಾರಣದಿಂದ ಉಂಟಾಗುವ ಸಮಸ್ಯೆಗಳ ಬಗ್ಗೆ ಮನಸ್ಸಿನಲ್ಲಿ ಒಂದು ರೀತಿಯ ಹೆದರಿಕೆ ಇತ್ತು. ವೃತ್ತಪತ್ರಿಕೆಯ ಲೇಖನ ಈ ಹೆದರಿಕೆಯನ್ನು ಉಲ್ಬಣಗೊಳಿಸಿದ್ದು, ತನಗೆ ಹೃದಯದ ಕಾಯಿಲೆ ಇರಬಹುದು ಎಂಬ ಒಂದು ಶಂಕೆ ಮನಸ್ಸಿನಲ್ಲಿ ಹುಟ್ಟಿಕೊಂಡಿತ್ತು. ಇದನ್ನು ನಾವು ನಮ್ಮ ಭಾಷೆಯಲ್ಲಿ 'ರೋಗ ಭಯ' ಅಥವಾ 'ಹೈಪೋಕೊಂಡ್ರಿಯಾಸಿಸ್' ಎಂದು ಕರೆಯುತ್ತೇವೆ. 'ನೋಸೋಫೋಬಿಯ' ಎಂಬ ಇನ್ನೊಂದು ಹೆಸರು ಕೂಡ ಇದಕ್ಕೆ ಇದೆ.

ಈ ರೀತಿಯ ಭಯದಲ್ಲಿ ರೋಗಿಯು ತನಗೆ ಯಾವುದೋ ಒಂದು ರೋಗ ಬಂದುಬಿಟ್ಟಿದೆ ಎಂಬ ತೀರ್ಮಾನಕ್ಕೆ ಬಂದುಬಿಡುತ್ತಾರೆ. ಉದಾಹರಣೆಗೆ, ಕ್ಯಾನ್ಸರ್ ಅಥವಾ ಹೃದಯ ರೋಗ. ಇದರ ಲಕ್ಷಣಗಳನ್ನು ಓದಿಕೊಂಡು ತನಗೂ ಇದು ಬಂದುಬಿಟ್ಟಿದೆ ಎಂದು ಆ ಲಕ್ಷಣಗಳನ್ನೆಲ್ಲ ಅನುಭವಿಸತೊಡಗುತ್ತಾರೆ. ವೈದ್ಯರುಗಳು ಎಷ್ಟೇ ಸಲಹೆ ಸಮಾಧಾನ ಹೇಳಿದರೂ ಈ ರೋಗಿಗಳು ಸಮಾಧಾನಗೊಳ್ಳುವುದಿಲ್ಲ. ಆರೋಗ್ಯಕ್ಕೆ ಸಂಬಂಧಪಟ್ಟ ಟೆಸ್ಟ್‌ಗಳು ಬೇಕೇ ಬೇಕು ಎಂದು ಪಟ್ಟು ಹಿಡಿಯುತ್ತಾರೆ. ಈಗ ಗೂಗಲ್ ಮಹಾಶಯ ಬಂದ ಮೇಲಂತೂ ಇದರ ಸಮಸ್ಯೆ ಅತಿ ಹೆಚ್ಚಾಗಿದೆ. ಒಂದು ಟೆಸ್ಟ್ ಮಾಡಿದರೆ ಸಾಕಾಗುವುದಿಲ್ಲ; ಗೂಗಲ್ ಹೇಳುವ ಎಲ್ಲ ಟೆಸ್ಟ್‌ಗಳು ಆಗಬೇಕೆಂದು ಪಟ್ಟು ಹಿಡಿಯುವ ರೋಗಿಗಳು ಇದ್ದಾರೆ.

Image

ಹರೀಶರೊಂದಿಗೆ ಸುದೀರ್ಘ ಮಾತುಕತೆ ನಡೆಯಿತು. ಅವರು ಹೇಳುತ್ತಿದ್ದ ಎಲ್ಲ ಲಕ್ಷಣಗಳು ಒತ್ತಡದ ಬೇನೆಗಳು ಎಂಬುದರಲ್ಲಿ ಯಾವುದೇ ಸಂಶಯ ನನಗೆ ಇರಲಿಲ್ಲ. ಈ ಒತ್ತಡದ ಬೇನೆಯಿಂದಾಗಿ  ಅವರು ಒಂದು ರೀತಿಯ ಆತಂಕಕ್ಕೆ (ಆಂಕ್ಸೈಟಿ) ಒಳಗಾಗಿದ್ದರು. ನಿದ್ರೆ ಸರಿಯಾಗಿ ಬರುತ್ತಿರಲಿಲ್ಲ. ಎದೆ ಬಡಬಡ ಹೊಡೆದುಕೊಳ್ಳುತ್ತಿತ್ತು. ಬ್ಯಾಂಕಿನ ಫೈಲುಗಳನ್ನು ಹೊತ್ತುಕೊಂಡು ಮನೆಗೆ ಹೋಗಿ ಎಡಕೈಯಲ್ಲಿ ನೋವು ಕೂಡ ಬಹಳ ಜಾಸ್ತಿ ಆಗಿತ್ತು. ಇವೆಲ್ಲವನ್ನೂ ಹರೀಶ್ - ಹೃದಯರೋಗದ ಲಕ್ಷಣ ಎಂದು ತಪ್ಪಾಗಿ ಅರ್ಥೈಸಿಕೊಂಡಿದ್ದರು.

ತನಗೆ ಕಾಯಿಲೆ ಇದೆ, ತಾನು ಸಾಯುತ್ತೇನೆ ಎಂಬ ಯೋಚನೆಯನ್ನು ಪದೇಪದೆ ಮಾಡಿದ ಹರೀಶ್, ಖಿನ್ನತೆಗೆ (ಡಿಪ್ರೆಷನ್) ಒಳಗಾಗಿದ್ದರು. ಹರೀಶರನ್ನು ಆಸ್ಪತ್ರೆಯ ಕ್ಲಿನಿಕಲ್ ಮನೋಶಾಸ್ತ್ರಜ್ಞರಿಗೆ ಪರಿಚಯ ಮಾಡಿಕೊಡಲಾಯಿತು. ಹಾಗೆಯೇ, ಅವರ ಹೆದರಿಕೆ ಮತ್ತು ನಿದ್ರಾಹೀನತೆ ಶಮನಗೊಳಿಸಲು ಮಾತ್ರೆಗಳನ್ನು ಕೊಡಲಾಯಿತು. ಕ್ಲಿನಿಕಲ್ ಮನೋಶಾಸ್ತ್ರಜ್ಞರು ಕೆಲವು  ರೀಲಾಕ್ಸೇಷನ್ ಎಕ್ಸಸೈಜ್‌ಗಳನ್ನು (ಕಸರತ್ತು) ಹೇಳಿಕೊಟ್ಟರು. ಹಾಗೆಯೇ, ಅವರ ಯೋಚನೆಗಳನ್ನು ಸರಿಯಾಗಿ ಪರಿಶೀಲಿಸಿ, ಅವರು ಮಾಡುತ್ತಿದ್ದಂತಹ ನಕಾರಾತ್ಮಕ ಯೋಚನೆಗಳನ್ನು ಹೇಗೆ ಸರಿಪಡಿಸಿಕೊಳ್ಳಬೇಕು ಎಂಬುದರ ಬಗ್ಗೆ ಕೂಡ ಮಾಹಿತಿ ನೀಡಿದರು. ಸುಮಾರು ಹದಿನೈದು ದಿನಗಳು ಆಗುತ್ತ, ಹರೀಶರ ಸಮಸ್ಯೆಗಳು ಕಡಿಮೆಯಾಗುತ್ತ ಬಂದವು.

ಈ ಲೇಖನ ಓದಿದ್ದೀರಾ?: ಮುಟ್ಟು ನಿಲ್ಲುವ ಸಮಯದ ಮಾನಸಿಕ ಸಮಸ್ಯೆಗಳೇನು? ಅವುಗಳನ್ನು ನಿಭಾಯಿಸುವಲ್ಲಿ ಕುಟುಂಬ ಸದಸ್ಯರ ಪಾತ್ರವೇನು?

ಈ 'ರೋಗ ಭಯ' ಅನ್ನುವುದು ಬಹಳ ವಿಚಿತ್ರವಾದ ಕಾಯಿಲೆ. ಯಾವುದೋ ಒಂದು ಗುಣವಾಗದ ರೋಗ ತನಗಿದೆ ಎಂಬ ಭ್ರಮೆಯಿಂದ ಹಲವಾರು ಪರೀಕ್ಷೆಗಳನ್ನು ಮಾಡಿಸಿಕೊಳ್ಳುವರು. ಕೆಲವೊಮ್ಮೆ, ಯಾವುದೇ ಪರೀಕ್ಷೆಗಳನ್ನು ಮಾಡದೆಯೂ ತನಗೆ ಕಾಯಿಲೆ ಇದೆ ಎಂದು ಊಹಿಸಿಕೊಂಡು ಯಾರೊಂದಿಗೂ ಹಂಚಿಕೊಳ್ಳದೆ ಮನಸ್ಸಿನ ದುಗುಡ ಜಾಸ್ತಿ ಮಾಡಿಕೊಂಡು ಆತ್ಮಹತ್ಯೆ ಮಾಡಿಕೊಳ್ಳುವ ರೋಗಿಗಳೂ ಇದ್ದಾರೆ. ಈ 'ರೋಗ ಭಯ'ವನ್ನು ಸರಿಯಾದ ಸಮಯದಲ್ಲಿ ಗುರುತಿಸಲಾಗದೆ ಇದ್ದರೆ ಅನವಶ್ಯವಾಗಿ ಹಲವಾರು ರಕ್ತಪರೀಕ್ಷೆಗಳು, ಸ್ಕ್ಯಾನ್‌ಗಳನ್ನು ಮಾಡಿಕೊಂಡು ಒಬ್ಬ ವೈದ್ಯರಿಂದ ಮತ್ತೊಬ್ಬರು ವೈದ್ಯರಲ್ಲಿಗೆ ಹೋಗುತ್ತಲೇ ಇರುತ್ತಾರೆ. ಅನವಶ್ಯವಾಗಿ ಹಣ ಖರ್ಚು ಮಾಡುತ್ತಾರೆ.

ಕೊನೆಗೂ ಹರೀಶ್ ತಮ್ಮ ರೋಗಭಯದಿಂದ ಗುಣಮುಖರಾದರು. ಬೆಂಗಳೂರಿಗೆ ಪುನಃ ಹೃದಯರೋಗ ಚಿಕಿತ್ಸೆಗೆ ಹೋಗಲಿಲ್ಲ. ಆದರೆ, ಹರೀಶರ ಹಾಗೆ ಹೆಚ್ಚಿನವರ ಈ 'ರೋಗ ಭಯ' ಸುಖಾಂತ್ಯ ಕಾಣುವುದಿಲ್ಲ. ಈ ರೋಗ ಭಯ ಎನ್ನುವ ಕಾಯಿಲೆ ಹಲವೊಮ್ಮೆ ವೈದ್ಯರುಗಳ ಸಮಯವನ್ನೂ ಹಾಳುಮಾಡುತ್ತದೆ, ರೋಗಿಯ ಹಣವನ್ನು ವ್ಯರ್ಥಗೊಳಿಸುತ್ತದೆ. ಮನೆಯವರ ಗಾಬರಿ ಹೆಚ್ಚಿಸುತ್ತದೆ. ಆದ್ದರಿಂದ ಗೂಗಲ್‌ಗಿಂತ ನಿಮ್ಮ ಕುಟುಂಬ ವೈದ್ಯರನ್ನು ಹೆಚ್ಚು ನಂಬಿ.

ಕಲಾಕೃತಿಗಳ ಕೃಪೆ: unsplash ಜಾಲತಾಣ
ನಿಮಗೆ ಏನು ಅನ್ನಿಸ್ತು?
11 ವೋಟ್