ಕರುಣೆಯ ಕೃಷಿ | ಇಂಗೆಬಾರ್ಗ್ ಬಖ್‍ಮನ್ ಕವಿತೆ 'ಪ್ರತೀ ದಿನ'

Ingeborg Bachmann Poem

ಯುದ್ಧ ಘೋಷಿಸಲಾಗುವುದಿಲ್ಲ, ಇನ್ನೀಗ

ಮುಂದುವರಿಸಲಾಗುವುದು, ಅಷ್ಟೇ

Eedina App

 

ಭೀಕರವೆನ್ನುವುದು ದೈನಂದಿನವಾಗಿಬಿಟ್ಟಿದೆ

AV Eye Hospital ad

 

ಶೂರ ರಣರಂಗದಿಂದ ದೂರವುಳಿದಿದ್ದಾನೆ

ದುರ್ಬಲರನ್ನು ಗುಂಡುಗಳನೆದುರಿಸಲು ಮುಂದೆ ಅಟ್ಟಲಾಗಿದೆ

 

ಸಂಯಮವೇ ಈಗಿನ ಸಮವಸ್ತ್ರವಾಗಿದೆ

ಭರವಸೆಯ ಕರುಣಾಜನಕ ಬೆಳಕೇ

ಎದೆಯ ಬಳಿಯ ಪದಕ

 

ಫಿರಂಗಿಗಳ ಸದ್ದು ನಿಂತ ಮೇಲೆ

ವೈರಿಗಳು ಅದೃಶ್ಯರಾದ ಬಳಿಕ

ಬೇರೇನೂ ಘಟಿಸದ ಹೊತ್ತಲ್ಲಿ

ನಿರಂತರ ಶಸ್ತ್ರಾಸ್ತ್ರಗಳ ನೆರಳು

ಆಕಾಶವ ಕವಿದ ಹೊತ್ತಲ್ಲಿ

ಪದಕವನ್ನು ಘೋಷಿಸಲಾಗುತ್ತದೆ

 

ಅದನ್ನು ಪ್ರದಾನ ಮಾಡಲಾಗುತ್ತದೆ

ಬಾವುಟವ ತೊರೆದು ಬಂದವರಿಗೆ

ಗೆಳೆಯರೆದುರು ಶೌರ್ಯ ಪ್ರದರ್ಶಿಸುವವರಿಗೆ

ರಹಸ್ಯಗಳನ್ನು ಬಿಟ್ಟುಕೊಟ್ಟವರಿಗೆ

ಪ್ರತಿ ಆದೇಶವನೂ ಅವಗಣಿಸಿದವರಿಗೆ

* * * * *

“Every beautiful poem is an act of resistance” - Mahmoud Darwish

Ingeborg Bachmann 2

1953ರಲ್ಲಿ ಬರೆದ ಈ ಕವನ ಇಂದಿನ ಸನ್ನಿವೇಶಕ್ಕಾಗಿಯೇ ಬರೆದಿರುವಷ್ಟು ಪ್ರಸ್ತುತವಾಗಿದೆ. ಇದು ಆಸ್ಟ್ರಿಯಾ ದೇಶದ ಪ್ರಸಿದ್ಧ ಕವಯಿತ್ರಿ ಇಂಗೆಬಾರ್ಗ್ ಬಖ್‍ಮನ್‍ ಅವರ ಜನಪ್ರಿಯ ಕವಿತೆಗಳಲ್ಲೊಂದು. ಶಾಂತಿಕಾಲದಲ್ಲಿಯೂ ಯುದ್ಧದ ಭಾಶೆ-ವರಸೆಯಲ್ಲಿ ಮಾತನಾಡುವ, ವ್ಯವಹರಿಸುವ ಪ್ರಭುತ್ವಗಳು ಈಗ ಪ್ರತಿ ದೇಶದಲ್ಲಿಯೂ ಕಂಡುಬರುತ್ತಿವೆ. ಪಾರಂಪರಿಕ ಮತ್ತು ಸಾಮಾಜಿಕ ಮಾಧ್ಯಮಗಳೂ ಇದೇ ವರಸೆಯನ್ನೇ ಪ್ರತಿಫಲಿಸುತ್ತವೆ. ಹೀಗೆ, ಕದನ-ಮನೋಭಾವದ ಸಾರ್ವತ್ರೀಕರಣ ಮತ್ತು ಸಹಜೀಕರಣವಾಗುವುದರಿಂದ ಇಲ್ಲಸಲ್ಲದ ವೈರಿಗಳನ್ನು ನಮ್ಮೆದುರು ನಿಲ್ಲಿಸಲಾಗುತ್ತದೆ. ತಮ್ಮದೇ ಬದುಕಿನ ಜಂಜಟಗಳಿಂದ ವ್ಯಗ್ರತೆಯಲ್ಲಿಯೇ ವಾಸಿಸಬೇಕಾಗಿರುವ ಜನರಿಗೆ ಈ ಕದನ-ಮನೋಭಾವ ಆಕರ್ಷಕವೆನಿಸುವುದು ಆಶ್ಚರ್ಯವೇನಲ್ಲ. ಅವರು ಸುಲಭವಾಗಿ ಪ್ರಭುತ್ವ ಹರಿಬಿಡುವ ಕದನ-ಕಥನಗಳನ್ನು ಸ್ವೀಕರಿಸಿಬಿಡುತ್ತಾರೆ. ತಮ್ಮದೇ ಸುತ್ತಮುತ್ತ, ನೆರೆಹೊರೆಯಲ್ಲಿ ವೈರಿಗಳನ್ನು ಸೂಚಿಸಿದರೂ ಹೌದೆಂದು ಮುಗಿಬಿದ್ದು ಹಿಂಸೆಗೆ ತೊಡಗಲು ಹಿಂದೇಟು ಹಾಕುವುದಿಲ್ಲ. ಇತಿಹಾಸದಲ್ಲಿ ಅದೆಷ್ಟು ಉದಾಹರಣೆಗಳಿವೆ! ನಮ್ಮದೇ ಸಮಾಜದಲ್ಲಿ ನಮ್ಮ ಕಣ್ಣ ಮುಂದೆ ಆಗುತ್ತಿರುವುದೂ ಇದೇ ತಾನೇ?

ನಮ್ಮ ವಾಸ್ತವವನ್ನು ಬಖ್‍ಮನ್ ಅವರ, 'ಭೀಕರವೆನ್ನುವುದು ದೈನಂದಿನವಾಗಿಬಿಟ್ಟಿದೆ' ಎಂಬ ಸಾಲಿಗಿಂತ ಚೆನ್ನಾಗಿ ಹೇಗೆ ಹೇಳುವುದು? ಅಕಾರಣ ಹಿಂಸೆ, ಅನವಶ್ಯ ವ್ಯಗ್ರತೆಗಳು ಸಾಮಾನ್ಯವಾಗಿಬಿಟ್ಟಿರುವ ಸಮಾಜದ ಚಿತ್ರಣ ಕೊಡುವ ಕವನ ಇದು. ಬಖ್‍ಮನ್ ಈ ಕವನ ಬರೆದದ್ದು, ಶೀತಲ ಸಮರ ಶುರುವಾದ ಜಾಗತಿಕ ಸಂಧರ್ಭದಲ್ಲಿ. ಹುಸಿ ಹೀರೋಯಿಸಂ, ಕಪಟ ಶೌರ್ಯ ಪ್ರದರ್ಶನಗಳನ್ನು ಬಳಸಿ ಯುದ್ಧ ಸಾಮಗ್ರಿಗಳ ವ್ಯಾಪಾರವನ್ನು ಸಮರ್ಥನೀಯವಾಗಿಸುತ್ತಿದ್ದ ಕಾಲ. ಆ ಹಿನ್ನೆಲೆಯಲ್ಲಿ, ಭರವಸೆಯನ್ನು ಹೊಂದಿರುವುದೇ, ಸಹನೆಯಿಂದ ವರ್ತಿಸುವುದೇ ದೊಡ್ಡತನ ಆಗಿಬಿಡುತ್ತದೆ.

ಇಂಗೆಬಾರ್ಗ್ ಬಖ್‍ಮನ್‍ (1926-1973), ಪಾಲ್ ಸೆಲಾನ್ ಮತ್ತು ಗುಂಟರ್ ಗ್ರಾಸ್, ಹೀನ್ರಿಕ್ ಬಾಲ್ ಮತ್ತು ಪೀಟರ್ ಹಂಡ್ಕೆ ಅವರುಗಳಂತೆ 'ಗ್ರೂಪ್ 47' ಎಂಬ ಸಾಹಿತ್ಯಿಕ ಸಮೂಹದ ಸದಸ್ಯರಾಗಿದ್ದರು. ಯುದ್ಧೋತ್ತರ ಜರ್ಮನ್ ಭಾಷಾ ಸಾಹಿತ್ಯವನ್ನು ರೂಪಿಸಿದ ಶ್ರೇಯ ಈ ಸಮೂಹದ್ದು. ಬಖ್‍ಮನ್ ಕೂಡ ತಮ್ಮ ನಲವತ್ತೇಳು ವರುಷಗಳ ಸೀಮಿತ ಜೀವಿತಾವಧಿಯಲ್ಲಿ ನಾಜಿ ವಿರೋಧಿ ಮತ್ತು ಸ್ತ್ರೀವಾದಿ ಅಂಶಗಳುಳ್ಳ, ವಿಕ್ಷಿಪ್ತವಾಗಿದ್ದರೂ ಮಾಂತ್ರಿಕ ಶಕ್ತಿಯ ಕಾವ್ಯ ಬರೆದರು. ದೈನಂದಿನ ಬದುಕಿನಲ್ಲಿ ಉಳಿದಿರುವ ನಾಜಿಸಂನ ಸುಳಿವುಗಳ ಶೋಧ ಅವರ ಕಾವ್ಯದಲ್ಲಿ ಕಂಡುಬರುತ್ತದೆ.

ಇದನ್ನು ಓದಿದ್ದೀರಾ?: ಕರುಣೆಯ ಕೃಷಿ | ನಾಜಿಮ್ ಹಿಕ್ಮತ್ ಕವಿತೆ 'ಎದೆನೋವು'

"ನಮ್ಮ ಬಳಿ ಶಬ್ದ ಇದೆಯಾದರೆ, ನಮ್ಮ ಬಳಿ ಭಾಶೆ ಇದೆಯಾದರೆ ಆಯುಧಗಳ ಅವಶ್ಯಕತೆಯೇ ಇರುವುದಿಲ್ಲ," ಎನ್ನುವ ಬಖ್‍ಮನ್, ತಮ್ಮ ಕಾವ್ಯದ ಮೂಲಕ ಅಭಿವ್ಯಕಿಗೆ ಅತೀತವಾಗಿರುವ ಕೇಡಿನ ಕುರಿತಾಗಿ ಬರೆಯಲು ಭಾಶೆಯೊಂದಿಗೆ ಸೆಣಸುವುದೇ ತಮ್ಮ ಕಲೆಯ ಮರ್ಮ ಎಂದು ನಂಬಿದ್ದ ಕವಯಿತ್ರಿ. ತಮ್ಮ ತೀವ್ರ ಹತಾಶೆಯ ಸಂಧರ್ಭದಲ್ಲಿ ಅವರು, "ಅಭಿವ್ಯಕ್ತಿ ಎನ್ನುವುದು ಹುಚ್ಚುತನವಲ್ಲದೆ ಮತ್ತೇನೂ ಅಲ್ಲ," ಎಂದಿರುವುದೂ ಉಂಟು.

ಕವಿ ಚಾರ್ಲ್ಸ್ ಸಿಮಿಚ್ ಅವರ ಪ್ರಕಾರ, ಬಖ್‍ಮನ್ ಅವರ ಕಾವ್ಯದಲ್ಲಿ ವಿಶ್ವಯುದ್ಧದ ಪ್ರತಿಮೆಗಳನ್ನು ಬಳಸದೆಯೇ, ಯುದ್ಧದ ಭೀಕರತೆಯ ಕುರಿತ ಧ್ಯಾನವಿದೆ. ಇಪ್ಪತ್ತನೇ ಶತಮಾನದ ದುರಂತಗಳ ತೀಕ್ಷ್ಣ ಚಿತ್ರಣವಿದ್ದರೂ ಅವರ ಬರಹಗಳಲ್ಲಿ ಭವಿಷ್ಯದ ಕುರಿತಾದ ಆದರ್ಶ ಕಲ್ಪನೆಯೂ ಕಾಣಬರುವುದು ವಿಶೇಶ.

ನಿಮಗೆ ಏನು ಅನ್ನಿಸ್ತು?
1 ವೋಟ್
eedina app