ಕಾಮನ್‌ವೆಲ್ತ್‌ ಗೇಮ್ಸ್‌ | ಭಾರತ ಮಹಿಳಾ ಹಾಕಿ ತಂಡದ ಚಿನ್ನದ ಕನಸು ಭಗ್ನ

  • ಆಸ್ಟ್ರೇಲಿಯಾ ವಿರುದ್ಧ 0–3 ಅಂತರದಲ್ಲಿ ಸೋಲು
  • ಕಂಚಿನ ಪದಕಕ್ಕಾಗಿ ಭಾನುವಾರ ನ್ಯೂಜಿಲೆಂಡ್ ವಿರುದ್ಧ ಸೆಣಸಾಟ

ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆಯುತ್ತಿರುವ ಕಾಮನ್‌ವೆಲ್ತ್‌ ಕ್ರೀಡಾಕೂಟದ ಮಹಿಳಾ ಹಾಕಿ ವಿಭಾಗದಲ್ಲಿ ಚಿನ್ನದ ಪದಕ ಗೆಲ್ಲುವ  ಭಾರತದ ಕನಸು ಭಗ್ನಗೊಂಡಿದೆ. ಶುಕ್ರವಾರ ರಾತ್ರಿ ನಡೆದ ಸೆಮಿಫೈನಲ್‌ ಪಂದ್ಯದಲ್ಲಿ ಸವಿತಾ ಪೂನಿಯಾ ನೇತೃತ್ವದ ಭಾರತ ತಂಡ, ನಾಲ್ಕು ಬಾರಿಯ ಚಾಂಪಿಯನ್ ಆಸ್ಟ್ರೇಲಿಯಾ ವಿರುದ್ಧ 0–3 ಅಂತರದಲ್ಲಿ ಸೋಲನುಭವಿಸಿತು.

ಸೆಮಿಫೈನಲ್‌ ಪಂದ್ಯ ಪೂರ್ಣಾವಧಿಯ ವೇಳೆಗೆ 1-1 ಅಂತರದಲ್ಲಿ ಸಮಬಲಗೊಂಡಿತ್ತು. ಹೀಗಾಗಿ ವಿಜೇತರನ್ನು ನಿರ್ಣಯಿಸಲು ನೀಡಲಾದ ಶೂಟೌಟ್‌ನಲ್ಲಿ ಭಾರತ ವನಿತೆಯರು ಗೋಲು ಗಳಿಸುವಲ್ಲಿ ಯಶಸ್ವಿಯಾಗಲಿಲ್ಲ. ಎದುರಾಳಿ ಆಸ್ಟ್ರೇಲಿಯಾ ಮೂರೂ ಅವಕಾಶಗಳನ್ನು ಗೋಲಾಗಿ ಪರಿವರ್ತಿಸಿತು. ಆ ಮೂಲಕ ಚಿನ್ನ ಅಥವಾ ಬೆಳ್ಳಿ ಪದಕ ಸುತ್ತಿನ ಪಂದ್ಯದಿಂದ ಭಾರತ ಹೊರನಡೆದಿದೆ. ಕಂಚಿನ ಪದಕಕ್ಕಾಗಿ ಭಾನುವಾರ ನಡೆಯಲಿರುವ ಪಂದ್ಯದಲ್ಲಿ ಭಾರತವು ನ್ಯೂಜಿಲೆಂಡ್ ತಂಡದ ವಿರುದ್ಧ ಸೆಣಸಾಡಲಿದೆ.

ಮತ್ತೊಂದೆಡೆ ಚಿನ್ನದ ಪದಕಕ್ಕಾಗಿ ನಡೆಯುವ ಫೈನಲ್‌ ಪೈಪೋಟಿಯಲ್ಲಿ ಆಸ್ಟ್ರೇಲಿಯಾ, ಇಂಗ್ಲೆಂಡ್‌ ತಂಡದ ಸವಾಲನ್ನು ಎದುರಿಸಲಿದೆ. ನ್ಯೂಜಿಲೆಂಡ್ ತಂಡವನ್ನು 2–0 ಅಂತರದಿಂದ ಮಣಿಸುವ ಮೂಲಕ ಇಂಗ್ಲೆಂಡ್‌ ಫೈನಲ್‌ ಪ್ರವೇಶಿಸಿದೆ.‌

ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಭಾರತ ದಿಟ್ಟತನದ ಆಟ ಪ್ರದರ್ಶಿಸಿದರಾದರೂ ಗೋಲು ಗಳಿಸಲು ಯಶಸ್ವಿಯಾಗಲಿಲ್ಲ. ಆರಂಭದಲ್ಲಿ ಆಕ್ರಮಣಕಾರಿಯಾಗಿ ಆಡಿದ ಭಾರತ ತಂಡಕ್ಕೆ 8ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್ ಅವಕಾಶ ಲಭಿಸಿತ್ತು. ಗುರ್ಜಿತ್ ಕೌರ್ ಅದನ್ನು ಗೋಲಾಗಿ ಪರಿವರ್ತಿಸುವಲ್ಲಿ ವಿಫಲವಾದರು.

10ನೇ ನಿಮಿಷದಲ್ಲಿ ಆಸ್ಟ್ರೇಲಿಯಾದ ರೆಬೆಕಾ ಗ್ರೀನರ್ ಅವರು ಸವಿತಾ ಪೂನಿಯಾರ ತಡೆಗೋಡೆಯನ್ನು ಭೇದಿಸಿ ಗೋಲು ಗಳಿಸಿದರು. ಆಸ್ಟ್ರೇಲಿಯಾದ ಮುನ್ನಡೆ ಭಾರತವನ್ನು ಒತ್ತಡಕ್ಕೆ ದೂಡಿತು. ಪಂದ್ಯದ ಎರಡನೇ ಅವಧಿಯ ಮುಕ್ತಾಯಕ್ಕೆ 4 ನಿಮಿಷ ಬಾಕಿಯಿದ್ದ ವೇಳೆ ಭಾರತದ ಸುಶೀಲಾ ಚಾನು ನೀಡಿದ ಪಾಸ್ ಅನ್ನು ಕಟಾರಿಯಾ ಗೋಲಾಗಿ ಪರಿವರ್ತಿಸಿದರು. ಆ ಮೂಲಕ ಪಂದ್ಯ 1-1 ರಲ್ಲಿ ಸಮಬಲಗೊಂಡಿತು.

ಈ ಸುದ್ದಿ ಓದಿದ್ದೀರಾ ? : ಕಾಮನ್‌ವೆಲ್ತ್ ಗೇಮ್ಸ್‌ | 'ಚಿನ್ನದ ಬೇಟೆ' ಮುಂದುವರಿಸಿದ ಭಾರತ; ಕುಸ್ತಿಯಲ್ಲಿ ಒಂದೇ ದಿನ ಮೂರು ಚಿನ್ನ

Image

ಶೂಟೌಟ್ ವಿವಾದ: ಪೆನಾಲ್ಟಿ ಶೂಟೌಟ್​ನಲ್ಲಿ ವಿವಾದ ಉಂಟಾಯಿತು. ಆಸ್ಟ್ರೇಲಿಯಾದ ಆಂಬ್ರೋಸಿಯಾ ಮಲೋನ್ ಮೊದಲ ಪೆನಾಲ್ಟಿ ಅವಕಾಶ ಪಡೆದು ಚೆಂಡನ್ನು ಗೋಲಿನೆಡೆಗೆ ದೂಡಿದಾಗ ಅದನ್ನು ಗೋಲ್​ಕೀಪರ್​ ಸವಿತಾ ಯಶಸ್ವಿಯಾಗಿ ತಡೆದರು. ಆದರೆ, ಟೈಮರ್​ ಆರಂಭವಾಗದ ಕಾರಣ ಮತ್ತೊಂದು ಅವಕಾಶ ನೀಡಲಾಯಿತು. ಈ ವೇಳೆ, ಮಲೋನ್ ಅದನ್ನು ಗೋಲಾಗಿ ಪರಿವರ್ತಿಸಿದರು. ಇದು ವಿವಾದಕ್ಕೆ ಕಾರಣವಾಯಿತು.

ನಿಮಗೆ ಏನು ಅನ್ನಿಸ್ತು?
0 ವೋಟ್