ಫೇಸ್‌ಬುಕ್‌ನಿಂದ | ಕಾಡಿನ ಬೆಳದಿಂಗಳಲ್ಲಿ ಏಕಾಂಗಿಯಾಗಿ ಕಂಡ ಚುಕ್ಕೆ ಚಿರತೆಯ ಸೌಂದರ್ಯ

ಗಿರಿ ವಾಲ್ಮೀಕಿ ಬರಹ | ಇದ್ದಕ್ಕಿದ್ದಂತೆ ಇರುಳ ಹಕ್ಕಿಗಳ ಕೇಕೆ ಕಾಡಿನಾಳದಲ್ಲಿ ಆರಂಭವಾಯಿತು. ಪ್ರಕಾಶ್ ಸರ್ ತದೇಕತೆಯಿಂದ ಧ್ವನಿ ಬಂದ ದಿಕ್ಕಿನೆಡೆ ಕಿವಿಯಾನಿಸಿ, "ಗಿರಿ, ಆದಷ್ಟೂ ಬೇಗ ಕಣಿವೆಯ ವ್ಯಾಪ್ತಿಯಿಂದ ಹೊರ ನಡೆಯಬೇಕು," ಎಂದರು. ಲಘುಬಗೆಯಿಂದ ಹೆಬ್ಬಾವಿನಂಥ ಹಾದಿಯಲ್ಲಿ ನಡೆಯುತ್ತ ಸಾಗಲಾಗಿ, ಒಮ್ಮೆಲೇ ಅಡ್ಡ ಸಿಕ್ಕಿದ್ದು ಹುಲ್ಲುಗಾವಲಿನ ಬಯಲು...

ಅಪ್ಪಟ ಡೆಕ್ಕನ್ನಿನ ಬಿಸಿಲ ಬಯಲಿನಲ್ಲಿ ಹುಟ್ಟಿ ಬೆಳೆದ ನಾನು. ಪಶ್ಚಿಮ ಘಟ್ಟಗಳ ಕಾಡು ಸೇರಿದ ನಂತರ ನಮ್ಮೂರಿನ ಭೌಗೋಳಿಕ ದೃಶ್ಯಾವಳಿಗಳ ಮತ್ತು ಅಲ್ಲಿಯ ಅಳಿವಿನಂಚಿನ ಶ್ರೀಮಂತ ಕುರುಚಲು ಕಾಡಿನ ಜೀವವೈವಿಧ್ಯತೆಯ ಬಗ್ಗೆ ಸಾದ್ಯಂತವಾಗಿ ಅರಣ್ಯಾಧಿಕಾರಿ ಪ್ರಕಾಶ್ ಎಸ್ ಎಚ್ ಅವರಿಗೆ ವಿವರಿಸುತ್ತಿದ್ದೆ. ತುಂಗಭದ್ರಾ ನದಿ ನಮ್ಮೂರಿನ ಚಿರತೆ, ಕರಡಿ, ತೋಳ ಹಾಗೂ ಅಲ್ಲಿಯ ನೀರುನಾಯಿ, ಕಬ್ಬೆಕ್ಕು ಮತ್ತು ಶೆಡ್ಯೂಲ್‌-1ರಲ್ಲಿ ಬರುವ ಪ್ರಾಣಿಗಳ ಸಂರಕ್ಷಣೆಯ ಸವಾಲಿನ ಬಗ್ಗೆ ಮಾತನಾಡುತ್ತ, ಖಾನಾಪುರ ತಾಲೂಕಿನ ಜಾಂಬೋಟಿ ಅರಣ್ಯ ಪ್ರದೇಶಕ್ಕೆ ಅಂಟಿಕೊಂಡಿರುವ ಚೋರ್ಲಾ ಕಣಿವೆಯಲ್ಲಿ ಕೆಲಸದ ನಿಮಿತ್ತ ಅಲೆಯುತ್ತಿದ್ದೆವು.

Eedina App

ತುಂಬು ತನ್ಮಯತೆಯಿಂದ ನನ್ನ ಡೆಕ್ಕನ್ ಬಯಲಿನ ಅನುಭವಗಳನ್ನು ಆಲಿಸುತ್ತ ನಡೆಯುತ್ತಿದ್ದ ಅವರು ಗಕ್ಕನೆ ನಿಂತು, ಸಮಯ ನೋಡಿಕೊಂಡು, "ಗಿರಿ... ತಡವಾಯಿತು. ಆದಷ್ಟು ಬೇಗ ಈ ಬೆಟ್ಟದ ಕಿಬ್ಬಿಯಿಂದಿಳಿದು ಕ್ಯಾಂಪಿಗೆ ಹೋಗುವ," ಎಂದರು. ಕಾರಣ, ಸಂಜೆಯಾಗುತ್ತಲೇ ಕಾಡಿಗೆ ಜೀವ ಬರತೊಡಗುತ್ತದೆ (ಮೃಗೀಯ ಪ್ರಾಣಿಗಳ ಸಂಚಾರ ಆರಂಭವಾಗುತ್ತದೆ). ಮಬ್ಬು ಕತ್ತಲೆಯಲ್ಲಿ ನಮ್ಮ ಕಾಡುದಾರಿ ಸಾಗತೊಡಗಿತು. ಅಷ್ಟೇನೂ ಪರಿಚಿತವಲ್ಲದ ಜಾಂಬೋಟಿ ಅರಣ್ಯ ಪ್ರದೇಶವು ನಾನು ಇಷ್ಟು ವರ್ಷಗಳಲ್ಲಿ ನೋಡಿದ ಕಾಡುಗಳಲ್ಲೇ ಭಿನ್ನವಾದ, ಅತ್ಯಂತ ನಿರ್ಮಾನುಷವಾದ ಭೌಗೋಳಿಕ ಪ್ರದೇಶ. ಇಲ್ಲಿಗೆ ಬಂದು ಕಾಡೊಳಗೆ ಅಲೆಯುವ ಆರಂಭದಿಂದಲೂ ನನಗೆ ಒಂದು ತೆರನಾದ ಅವ್ಯಕ್ತ ಭಯ, ಆತಂಕ, ದ್ವಂದ್ವ ನನ್ನ ಗಮನಕ್ಕೆ ಬರುತ್ತಿತ್ತು.

ಈ ಲೇಖನ ಓದಿದ್ದೀರಾ?: ಫೇಸ್‌ಬುಕ್‌ನಿಂದ | ರಾಜ್‌ಕುಮಾರ್ ನಟನೆಯ 'ಗಂಧದ ಗುಡಿ' ಮತ್ತು ಪುನೀತ್ ಕಟ್ಟಿಕೊಟ್ಟ 'ಗಂಧದ ಗುಡಿ'

AV Eye Hospital ad

ಈ ವಿನಾಕಾರಣ ಯೋಚನೆಗಳಲ್ಲೇ ಸಮಯ ಸರಿಯುತ್ತಿತ್ತು. ಕ್ಯಾಂಪಿನ ಹಾದಿಯುದ್ದಕ್ಕೂ ಮೈ ನಡುಗಿಸುವ ಚಳಿ. ನಾವು ನಿಂತಿದ್ದ ಉತ್ತರ ದಿಕ್ಕಿನ ಚೋರ್ಲಾ ಕಣಿವೆಯನ್ನು ದಟ್ಟ ಮಂಜು ಆವರಿಸಿ ಹಾದಿ ಮಸುಕಾಗತೊಡಗಿತು. ಕಾಡಿನ ಮಬ್ಬು ಕತ್ತಲಿಗೆ ಕಣ್ಣು ಹೊಂದಿಸಿಕೊಳ್ಳುತ್ತ ಇಬ್ಬರೂ  ನಡೆಯತೊಡಗಿದೆವು. ಕಾಡಿನ ಹಾದಿಯ ಎಡ-ಬಲದಲ್ಲಿ ಲಂಟಾನ ಜಿಗ್ಗು, ಪೆಳೆಗಳು, ಹಾದಿಯ ಉದ್ದಕ್ಕೂ ಹಳದಿ ಬಣ್ಣಕ್ಕೆ ತಿರುಗಿದ ಮರಗಳ ಎಲೆಗಳು. ಇವೆಲ್ಲವುಗಳ ಮೇಲೆ ಮಲಪ್ರಭಾ ನದಿಯ ಉಗಮಸ್ಥಾನವಾದ ಮರಾಠಿ ಪ್ರಾಬಲ್ಯದ ಕನ್ನಡ ನೆಲದ ಕಣಕುಂಬಿ ಗ್ರಾಮ. ಜಾಂಬೋಟಿ ಗ್ರಾಮದಿಂದ ಅನತಿ ದೂರದಲ್ಲಿರುವ, ಕನ್ನಡವೇ ಗೊತ್ತಿಲ್ಲದ ಗೌಳಿಯಂಥ ಒಕ್ಕಲಿಗರೇ ವಾಸಿಸುವ ದಟ್ಟ ಕಾಡಿನ ತಪ್ಪಲಿನ ಒಂದು ಪುಟ್ಟ ಹಳ್ಳಿ. ಈ ಹಳ್ಳಿಯ ಕಳ್ಳ ಬೇಟೆ ತಡೆ ಶಿಬಿರದಲ್ಲಿ ನಮ್ಮ ವಾಸ್ತವ್ಯ ನಿಗದಿಯಾಗಿತ್ತು.

ಲಗುಬಗೆಯಿಂದ ಹೊರಟ ನಮಗೆ ಕರಡಿ, ಆನೆಗಳ ಭಯ ಕಾಡುತ್ತಿದ್ದರಿಂದ ಎಷ್ಟು ಸಾಧ್ಯವೋ ಅಷ್ಟು ಜೋರಾಗಿ ನಡೆಯತೊಡಗಿದೆವು. ಒದ್ದೆಯಾದ ನೆಲ ಆರಂಭವಾಗಿ ಜಾನುವಾರುಗಳ ಹೆಜ್ಜೆಯ ಗುರುತು ಮೂರು ದಾರಿ ಕೂಡುವ ಜಾಗದಲ್ಲಿ ಅಚ್ಚೊತ್ತಿದ್ದರಿಂದ, ಕ್ಯಾಂಪಿಗೆ ಹೋಗುವ ಸರಿಯಾದ ಮಾರ್ಗದ ಬಗ್ಗೆ ಗೊಂದಲ ಉಂಟಾಗಿತ್ತು. ಒಂದು ಕ್ಷಣ ಇಬ್ಬರೂ ನಿಂತಲ್ಲೇ ಧೇನಿಸಿ, ನಮ್ಮ ಎಡಕ್ಕೆ ನೀರು ಹರಿದುಹೋಗುವ ಚಿಕ್ಕ ತೊರೆಯ ಜಾಡನ್ನು ಬಳಸಿ ನಡಿಗೆ ಮುಂದುವರಿಸಿದೆವು. ಬೆಟ್ಟ ಇಳಿದು ಸುಮಾರು ಎರಡು ತಾಸಾಗಿದ್ದರಿಂದ, ಗಾಳಿಯೇ ಆಡದ ನಿತ್ಯಹರಿದ್ವರ್ಣ ಕಾಡುಗಳಲ್ಲಿ ದೇಹ ನಿರ್ಜಲೀಕರಣಕ್ಕೆ ಒಳಗಾಗಿತ್ತು.

ಪೊಡವಿ ಬೆಳಗಿದ ಪಶ್ಚಿಮದ ಸೂರ್ಯ ಕಣಿವೆಯೊಳಗೆ ಇಳಿಯತೊಡಗಿದ. ಕಾಡು ಮೆಲ್ಲನೆ ಬಂಗಾರ ಬಣ್ಣಕ್ಕೆ ವೇಷ ಬದಲಿಸತೊಡಗಿತು. ಸೂರ್ಯನ ಕೊನೆಯ ಕಿರಣ ಮಾಯವಾಗಿ ಕಾಡು ದೀರ್ಘ ಮೌನ ಧರಿಸಿದ್ದರಿಂದ ಸಹಿಸಲಸಾಧ್ಯವಾದ ಮೌನ ಎದೆಯಲ್ಲಿ ತೌಡು ಕುಟ್ಟುತ್ತಿತ್ತು. ದೂರದ ಚೋರ್ಲಾ ಕಣಿವೆಯ 'ವಿರಡೇ' ಜಲಪಾತದ ನೆತ್ತಿಯ ಮೇಲೆ ಹೈವೇ ಬದಿಯ ದೂರದ ಡಾಬಾಗಳಲ್ಲಿನ ಮಿಣುಕು ದೀಪದಂತೆ ನಕ್ಷತ್ರಗಳು ಜಲಪಾತದ ಮೇಲೆ ಮಿನುಗತೊಡಗಿದವು.

ಇದ್ದಕ್ಕಿದ್ದಂತೆ ಇರುಳ ಹಕ್ಕಿಗಳ ಕೇಕೆ ಕಾಡಿನಾಳದಲ್ಲಿ ಆರಂಭವಾದೊಡನೆ, ಪ್ರಕಾಶ್ ಸರ್ ತದೇಕತೆಯಿಂದ ಧ್ವನಿ ಬಂದ ದಿಕ್ಕಿನೆಡೆ ಕಿವಿಯಾನಿಸಿ ಶಬ್ದ ಕೇಳಿ, "ಗಿರಿ, ಆದಷ್ಟೂ ಬೇಗ ಕಣಿವೆಯ ವ್ಯಾಪ್ತಿಯಿಂದ ಹೊರ ನಡೆಯಬೇಕು," ಎಂದರು. ಲಘುಬಗೆಯಿಂದ ಹೆಬ್ಬಾವಿನಂಥ ಹಾದಿಯಲ್ಲಿ ನಡೆಯುತ್ತ ಸಾಗಲಾಗಿ, ಒಮ್ಮೆಲೇ ಹುಲ್ಲುಗಾವಲಿನ ಬಯಲು ನಮಗೆ ಅಡ್ಡವಾಗಿ, ಅಲ್ಲಿಂದ ನಾವು ನಿಂತ ಜಾಗದಿಂದ ಕೂಗಳತೆಯ ದೂರದಲ್ಲಿ ಸುಮಾರು 35-40 ಅಡಿಯ ದಿಬ್ಬದ ಮೇಲೆ ಅಸ್ಪಷ್ಟ ಚಲನೆಯನ್ನು ಕಂಡ ಪ್ರಕಾಶ್ ಸರ್, ಸದ್ದು ಮಾಡಬೇಡವೆಂದು ಬಾಯಿಯ ಮೇಲೆ ಬೆರಳಿಟ್ಟು ಸುಮ್ಮನಿರುವಂತೆ ನನಗೆ ಸೂಚಿಸಿದರು.

ಈ ಲೇಖನ ಓದಿದ್ದೀರಾ?: ಫೇಸ್‌ಬುಕ್‌ನಿಂದ | ದಡ್ಡರಿಗೆ 'ಕತ್ತೆ' ಅನ್ನೋರೂ ಅವರೇ, ಬುದ್ಧಿ ಚುರುಕಾಗುತ್ತೆ ಅಂತ ಕತ್ತೆಹಾಲು ಕುಡಿಸೋರೂ ಅವರೇ!

"ಏ... ಅಲ್ನೋಡು," ಎಂದಾಗ ಆ ಕತ್ತಲೆಗೆ ನನ್ನ ಕಣ್ಣುಗಳನ್ನು ಹೊಂದಿಸಿಕೊಳ್ಳುತ್ತ ದೃಷ್ಟಿ ನೆಟ್ಟು ನೋಡಿದರೆ, ಸಣ್ಣ ಪ್ರಮಾಣದ ಕದಲಿಕೆ. ಸ್ವಲ್ಪವೂ ಅಲುಗದೆ ಮತ್ತೆ ದೃಷ್ಟಿ ಕಿರುಕಿಸಿ ನಿರ್ದಾಕ್ಷಿಣ್ಯ ಕತ್ತಲಲ್ಲಿ ನೋಡಿದರೆ, ಬಂಗಾರದ ಬಣ್ಣದ ಕಪ್ಪುಚುಕ್ಕೆಯ ದೈತ್ಯನೊಬ್ಬ ಯಾವ ಗಡಿರೇಖೆಗಳ ಅಂಕೆಯಿಲ್ಲದೆ ನಿರ್ಬಿಢೆಯಿಂದ ಸಂಚರಿಸುತ್ತಿದ್ದರೆ ನನ್ನ ಜೀವ ಬಾಯಿಗೆ ಬಂದಿತ್ತು. ಅದರ ಠೀವಿ, ನಡಿಗೆ, ಗಾಂಭೀರ್ಯ, ರುದ್ರ-ಭೀಕರ ಸೌಂದರ್ಯವನ್ನು ವರ್ಣಿಸಲು ಕೂತರೆ, ಅಕ್ಷರಗಳು ಕೂಡ ಸೋಲುವಂತಹ ಅನನ್ಯ ಸೌಂದರ್ಯದ ಧೀಮಂತಿಕೆ ಅದಕ್ಕೆ ಪ್ರಾಪ್ತಿಯಾಗಿತ್ತು.

ಒಂದೆರೆಡು ಫೋಟೊಗಳನ್ನು ಪ್ರಕಾಶ್ ಅವರು ಕ್ಲಿಕ್ಕಿಸಿ ಅಲ್ಲಿಂದ ಹೊರಟರು. "ಆ ಚುಕ್ಕೆ ಚಿರತೆ ನಮ್ಮಿಬ್ಬರನ್ನು ಸುಮಾರು ಗಂಟೆಗಳಿಂದ ನಮಗೇ ತಿಳಿಯದೆ ಹಿಂಬಾಲಿಸಿ, ಹತ್ತಿರದಿಂದ ನಮ್ಮನ್ನು ಗಮನಿಸಿದೆ ಮತ್ತು ನಮ್ಮಿಬ್ಬರ ಮಾತುಕತೆಯ ಗಲಾಟೆಯಿಂದ ಭೀತಿಗೊಂಡು ದೂರ ಸರಿದಿದೆ," ಎಂದರು! ಚಿರತೆಯ ಮೈಯಿಯ ಮಾಂತ್ರಿಕತೆಗೆ ಸಿಕ್ಕು ಬೆಳದಿಂಗಳ ಬೆಳಕಿನಲ್ಲಿ ಇಬ್ಬರೂ ಕ್ಯಾಂಪಿನ ಕಡೆಗೆ ಹೊರಟಾಗ ಸಂಪೂರ್ಣ ಕತ್ತಲಾಗಿತ್ತು. ಕಾಲ ಬುಡದಲ್ಲಿ ಮಹಾದಾಯಿ ತಣ್ಣಗೆ ಗೋವೆಯ ಕಡೆಗೆ ಓಡತೊಡಗಿದ್ದಳು. ಕ್ಯಾಂಪ್ ಹತ್ತಿರವಾಗತೊಡಗಿತು. ಬಿದಿರ ಅಟ್ಟಣಿಗೆಯ ಮೇಲೆ ಕೂತು ಚಳಿಗೆ ಬೆಂಕಿ ಕಾಯಿಸುತ್ತ ಜಾಂಬೋಟಿ ಕಾಡಿಗೆ ಮಾತ್ರ ಸಿಮೀತವಾಗಿರುವ ರೋಟನ್ಡ್ ಟೇಲ್ಡ್ ಬಾವಲಿಗಳ ಬಗ್ಗೆ ಮಬ್ಬು ಬೆಳಕಿನಲ್ಲಿ ಅರಣ್ಯಾಧಿಕಾರಿ ಪ್ರಕಾಶ್ ಮತ್ತು ನಾನು, ಅಲ್ಲಿಯ ಸಿಬ್ಬಂದಿಯೊಂದಿಗೆ ಮಾತಿಗಿಳಿದೆವು.

ನನ್ನಿಡೀ ಕಾಡಿನ ಬದುಕಿನಲ್ಲಿ ಸಾಕಷ್ಟು ಬಾರಿ ಕಾಡುಪ್ರಾಣಿಗಳಿಗೆ ಕಾಡಿನ ನಡುವೆ ಹಗಲು-ರಾತ್ರಿಯ ಹೊತ್ತು ಸಾಕಷ್ಟು ಬಾರಿ ಮುಖಾಮುಖಿ ಎದುರಾದರೂ, ಈ ಚುಕ್ಕೆ ಚಿರತೆಯಷ್ಟು ಯಾವ ಚಿರತೆಯೂ ಇಲ್ಲಿಯವರೆಗೂ ಕಾಡಲಿಲ್ಲ. ಈಗಿನ ದಶಕಗಳಲ್ಲಿ ಮಾನವ-ವನ್ಯಜೀವಿ ಸಂಘರ್ಷದಲ್ಲಿ ಹುಲಿಯಂತೆ ಅದರ ಸಂಖ್ಯೆ ಕ್ಷೀಣಿಸುತ್ತಿರುವಾಗ, ಹೀಗೆ ಕಾಡಿನಲ್ಲಿ ಬೆಳದಿಂಗಳ ಹೊತ್ತಿನಲ್ಲಿ ಏಕಾಂಗಿಯಾಗಿ ಕಾಣಿಸುವ ಚಿರತೆಗಳ ಸೌಂದರ್ಯ ಮಾತ್ರ ವರ್ಣಿಸಲಸದಳ. ಕಾಡ ಬೆಳದಿಂಗಳ ಮಬ್ಬಿನಲ್ಲಿ ನಿರ್ಮಾನುಷವಾದ ಕಣಿವೆಯಲ್ಲಿ ನೋಡಿದ ಆ ಚುಕ್ಕೆ ಮಹಾಶಯ ನನ್ನ ಸ್ಮೃತಿಪಟಲದಲ್ಲುಳಿದು ವಿಭಿನ್ನ ರೋಮಾಂಚನಕ್ಕೆ ಈಡುಮಾಡಿದ್ದ. ಈ ಕಪ್ಪು ಚುಕ್ಕೆಯ ಚಿರತೆ ಮಾತ್ರ ನನ್ನ ಕಾಡಿನ ಅನುಭವವನ್ನು ಇನ್ನಷ್ಟು ಶ್ರೀಮಂತಗೊಳಿಸಿತ್ತು. ಅದರ ಕಣ್ಣು, ನಿರ್ಲಿಪ್ತ ನೋಟ, ಸ್ಥಿರತೆಯಿಂದ ಹಾದಿಯುದ್ದಕ್ಕೂ ನನಗ್ಯಾರು ಸಾರಿಸಾಟಿ ಎಂಬಂತಿತ್ತು.

ಪ್ರಕಾಶ್ ಅವರ ಕಾಡಿನ ಅನುಭವ ಕೇಳಿಸಿಕೊಳ್ಳುತ್ತ ಇಬ್ಬರೂ ಚಿರತೆಯ ಧ್ಯಾನದಲ್ಲೇ ಕಣಿವೆಯಿಳಿದು ಕತ್ತಲೆಯ ಕ್ಯಾಂಪಿನೆಡೆಗೆ ಬರುತ್ತಿದ್ದರೆ, ರೋಟನ್ಡ್ ಟೇಲ್ಡ್ ಬಾವಲಿಗಳು ಮಿಂಚಿನ ವೇಗದಲ್ಲಿ ಜಾಂಬೋಟಿ ಕಣಿವೆಯಲ್ಲಿ ಗಿರಕಿ ಹೊಡೆಯತೊಡಗಿದವು. ಎದುರಿನ ಮರದ ಕೊಂಬೆಯ ಮೇಲೆ ಗೂಬೆಯೊಂದು ನಮ್ಮನ್ನೇ ನೋಡುತ್ತ ನಿರ್ಲಕ್ಷಿಸಿ ಕತ್ತು ತಿರುಗಿಸಿತು.

ನಿಮಗೆ ಏನು ಅನ್ನಿಸ್ತು?
1 ವೋಟ್
eedina app