ಪತ್ರಿಕಾ ಸ್ವಾತಂತ್ರ್ಯ ದಿನ ವಿಶೇಷ | ಬೆನ್ನುಮೂಳೆಯನ್ನು ಪ್ರಭುತ್ವದ ಪದತಲದಲ್ಲಿಟ್ಟಿದೆ ಭಾರತೀಯ ಮಾಧ್ಯಮ

TRUMP MODI

ಅಮೆರಿಕ ಅಧ್ಯಕ್ಷ ಟ್ರಂಪ್ ಅವರಿಗೆ ಕಷ್ಟಕರ ಪ್ರಶ್ನೆ ಕೇಳಿದ ಮರುದಿನವೇ, ಸಿ.ಎನ್.ಎನ್ ಬಾತ್ಮೀದಾರ ಜಿಮ್ ಅಕೋಸ್ಟ ಅವರ ಶ್ವೇತಭವನದ ಮಾಧ್ಯಮ ಮಾನ್ಯತಾ ಪತ್ರ ರದ್ದಾಗುತ್ತದೆ. ಸಿ.ಎನ್.ಎನ್ ಆಡಳಿತ ವರ್ಗ ನ್ಯಾಯಾಲಯದ ಮೆಟ್ಟಿಲೇರುತ್ತದೆ. 300ಕ್ಕೂ ಹೆಚ್ಚು ಪತ್ರಿಕೆಗಳು ಸಂಪಾದಕೀಯ ಬರೆದು ಖಂಡಿಸುತ್ತವೆ. ಒಂದು ವೇಳೆ, ಈ ಪ್ರಕರಣ ಭಾರತದಲ್ಲಿ ಆಗಿದ್ದಿದ್ದರೆ?

ಭುವನದ ದೊಡ್ಡಣ್ಣ ತಾನು ಎಂದು ಭ್ರಮಿಸಿ ಬೀಗುವ ಅಮೆರಿಕೆಯ ಅಧ್ಯಕ್ಷರ ಕಚೇರಿ ಮತ್ತು ಸರ್ಕಾರಿ ನಿವಾಸದ ಹೆಸರು ಶ್ವೇತಭವನ. ರಾಜಧಾನಿ ವಾಷಿಂಗ್ಟನ್‌ನಲ್ಲಿರುವ ಶ್ವೇತಭವನದಲ್ಲಿ ನಡೆಯುವ ಶಕ್ತಿ ರಾಜಕಾರಣದ ನಿತ್ಯ ವ್ಯವಹಾರಗಳನ್ನು ವರದಿ ಮಾಡುವ ಹಿರಿಯ ಪತ್ರಕರ್ತರ ದೊಡ್ಡ ದಂಡೇ ಇರುತ್ತದೆ. ಶ್ವೇತಭವನ ಬಾತ್ಮೀದಾರರ ಸಂಘ ನೂರು ವರ್ಷಗಳಷ್ಟು ಹಳೆಯದು. ಅಮೆರಿಕೆಯ ಅಧ್ಯಕ್ಷರೂ ಸೇರಿದಂತೆ ಪ್ರಬಲ ಅಧಿಕಾರಿಗಳಿಂದ ಸಮಜಾಯಿಷಿಗಳು- ಉತ್ತರಗಳನ್ನು ಪಡೆಯಲು ಅನುವು ಮಾಡಿಕೊಡುವುದು ಈ ಸಂಘದ ಉದ್ದೇಶ.

ನಾಲ್ಕು ವರ್ಷಗಳಷ್ಟು ಹಿಂದಿನ ಮಾತು. ಶ್ವೇತಭವನದಲ್ಲಿ ಅಮೆರಿಕೆಯ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪತ್ರಿಕಾಗೋಷ್ಠಿ ನಡೆಯಿತು. ಸಿ.ಎನ್.ಎನ್ ಸುದ್ದಿವಾಹಿನಿಯ ಹಿರಿಯ ಪತ್ರಕರ್ತ ಜಿಮ್ ಅಕೋಸ್ಟ ಕೆಲ ನೇರ ನಿಷ್ಠುರ ಪ್ರಶ್ನೆಗಳನ್ನು ಜಿಗುಟಿನಿಂದ ಕೇಳಿದರು. ನುಣುಚಿಕೊಳ್ಳುವ ಅಥವಾ ಬಾಯಿ ಬಡಿಯುವ ಟ್ರಂಪ್ ಪ್ರಯತ್ನಗಳನ್ನು ಜಿಮ್ ಲೆಕ್ಕಿಸಲಿಲ್ಲ. ನೂರಾರು ಮೈಲು ದೂರದಲ್ಲಿರುವ ಮೆಕ್ಸಿಕೋದ ಅಸಹಾಯಕ ವಲಸೆಗಾರರ 'ಕಾರವಾನ್' ಅನ್ನು ದಾಳಿಕೋರರು ಎಂದು ತಾವು ಕರೆದದ್ದು ಸರಿ ಎಂದು ಟ್ರಂಪ್ ಸಮರ್ಥಿಸಿಕೊಳ್ಳುತ್ತಾರೆ.

''ನೀವೊಬ್ಬ ಕೆಟ್ಟ ಅಸಭ್ಯ ಒರಟು ವ್ಯಕ್ತಿ. ನಿಮ್ಮನ್ನು ಕೆಲಸಕ್ಕೆ ಇಟ್ಟುಕೊಂಡಿರುವ ಸಿ.ಎನ್.ಎನ್‌.ಗೆ ನಾಚಿಕೆಯಾಗಬೇಕು. ಸಿ.ಎನ್.ಎನ್.ಗೆ ನೀವು ಕೆಲಸ ಮಾಡಕೂಡದು, ಸಾಕು ಕುಳಿತುಕೊಳ್ಳಿ,'' ಎನ್ನುತ್ತಾರೆ ಟ್ರಂಪ್. ಸರ್ಕಾರಿ ಸಹಾಯಕಿ ಜಿಮ್ ಕೈಯಲ್ಲಿನ ಧ್ವನಿವರ್ಧಕವನ್ನು ಕಿತ್ತುಕೊಳ್ಳುವ ಪ್ರಯತ್ನ ಮಾಡುತ್ತಾರೆ.

Image
Donald Trump
ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್

ಇನ್ನೂ ಕೆಲ ಪ್ರಶ್ನೆಗಳು ಟ್ರಂಪ್ ಅವರಿಗೆ ಎದುರಾಗುತ್ತವೆ. "ಅತ್ಯಂತ ಹಗೆತನದ ಪ್ರತಿಕೂಲ (ಸುದ್ದಿ) ಮಾಧ್ಯಮಗಳು ನೀವು, ಅತ್ಯಂತ ದುಃಖದ ಸಂಗತಿಯಿದು," ಎಂದು ಪತ್ರಿಕಾಗೋಷ್ಠಿಯಲ್ಲಿನ ಪತ್ರಕರ್ತರ ಕುರಿತು ಟ್ರಂಪ್ ಅಸಮಾಧಾನ ಕಾರುತ್ತಾರೆ.

''ನಿಮ್ಮ ವಾಗಾಡಂಬರದ ಕಾರಣ, ನಿಮ್ಮ ರಿಪಬ್ಲಿಕನ್ ಪಕ್ಷವು ಬಿಳಿಯರ ರಾಷ್ಟ್ರವಾದವನ್ನು ಸಮರ್ಥಿಸುವ ಪಕ್ಷ ಎಂದು ಹೇಳುವವರಿದ್ದಾರೆ. ಏನಂತೀರಿ?'' ಎಂಬುದು ಮತ್ತೊಬ್ಬ ವರದಿಗಾರನ ಪ್ರಶ್ನೆ. ಈ ಪ್ರಶ್ನೆಯೇ ವರ್ಣಭೇದದಿಂದ ಕೂಡಿದ್ದು ಎಂದು ಟ್ರಂಪ್ ಖಂಡಿಸುತ್ತಾರೆ. "ಅತಿ ಹೆಚ್ಚು ಆಫ್ರಿಕನ್- ಅಮೆರಿಕನ್ (ಕಪ್ಪು ವರ್ಣೀಯ ಅಮೆರಿಕನ್) ಪ್ರತಿನಿಧಿಗಳನ್ನು ಹೊಂದಿರುವ ಪಕ್ಷ ನಮ್ಮದು," ಎಂದು ಪದೇ ಪದೇ ಹೇಳುತ್ತಾರೆ.

ಮರುದಿನ ಸಿ.ಎನ್.ಎನ್ ಬಾತ್ಮೀದಾರ ಜಿಮ್ ಅಕೋಸ್ಟ ಅವರ ಶ್ವೇತಭವನದ ಮಾಧ್ಯಮ ಮಾನ್ಯತಾ ಪತ್ರವನ್ನು ಸರ್ಕಾರ ರದ್ದುಪಡಿಸುತ್ತದೆ. ವಿಶ್ವದ ಅತ್ಯಂತ ಶಕ್ತಿಶಾಲಿ ಎಂದು ಬಗೆಯಲಾಗುವ ಅಮೆರಿಕೆಯ ಅಧ್ಯಕ್ಷನ ಈ ಸರ್ವಾಧಿಕಾರಿ ನಡವಳಿಕೆಯ ಮುಂದೆ ಸಿ.ಎನ್.ಎನ್ ಆಡಳಿತ ವರ್ಗ ಮಂಡಿ ಊರುವುದಿರಲಿ, ತಲೆಯನ್ನೂ ಬಾಗಿಸುವುದಿಲ್ಲ. ಬದಲಾಗಿ, ನ್ಯಾಯಾಲಯದ ಮೆಟ್ಟಿಲೇರುತ್ತದೆ. ಟ್ರಂಪ್ ಅವರನ್ನು ಬಲವಾಗಿ ಬೆಂಬಲಿಸುವ 'ಫಾಕ್ಸ್ ನ್ಯೂಸ್' ಸುದ್ದಿವಾಹಿನಿಯೂ ಸೇರಿದಂತೆ ಬಹುಸಂಖ್ಯೆಯ ಸುದ್ದಿವಾಹಿನಿಗಳು ಜಿಮ್ ಜೊತೆ ನಿಲ್ಲುತ್ತವೆ. ಮಾನ್ಯತಾ ಪತ್ರವನ್ನು ರದ್ದುಪಡಿಸಿದ ಕ್ರಮವು ಜನತಂತ್ರ ವಿರೋಧಿ ಎಂದು 300ಕ್ಕೂ ಹೆಚ್ಚು ಅಮೆರಿಕನ್ ಪತ್ರಿಕೆಗಳು ಸಂಪಾದಕೀಯ ಬರೆದು ಖಂಡಿಸುತ್ತವೆ. ಟ್ರಂಪ್ ಸರ್ಕಾರದಿಂದಲೇ ನೇಮಕಗೊಂಡ ಜಿಲ್ಲಾ ನ್ಯಾಯಾಧೀಶರೊಬ್ಬರು, ಜಿಮ್ ಅಕೋಸ್ಟ ಅವರ ಮಾನ್ಯತಾ ಪತ್ರ ರದ್ದನ್ನು ತಕ್ಷಣವೇ ಹಿಂದಕ್ಕೆ ಪಡೆಯುವಂತೆ ಹಂಗಾಮಿ ತೀರ್ಪು ನೀಡುತ್ತಾರೆ.

ಇದನ್ನು ಓದಿದ್ದೀರಾ?: 2020ರಲ್ಲಿ ನಾಲ್ವರು ಪತ್ರಕರ್ತರ ಹತ್ಯೆ; ವಿಶ್ವದ ಅಪಾಯಕಾರಿ ದೇಶಗಳಲ್ಲೊಂದು ಭಾರತ

ಟ್ರಂಪ್ ಅವರು ವರದಿಗಾರರನ್ನು ಕಸ, ಕೊಳೆ, ಲೋಳೆ, ರೋಗಗ್ರಸ್ತರು, ದೇಶಭಕ್ತಿ ಇಲ್ಲದವರು, ನಮ್ಮ ದೇಶವನ್ನು ಇಷ್ಟಪಡದವರು, ನಮ್ಮ ಇತಿಹಾಸ ಮತ್ತು ಪರಂಪರೆಯ ಕುರಿತು ಗೌರವ ಇಲ್ಲದವರು ಎಂದು ಬಹುತೇಕ ದಿನ ಬೆಳಗಾದರೆ ಜರೆಯುತ್ತಾರೆ. ಅಮೆರಿಕೆಯ ಮುಂಚೂಣಿ ಸುದ್ದಿ ಸಂಸ್ಥೆಗಳಿಗೆ ''ಫೇಕ್ ನ್ಯೂಸ್' (ನಕಲಿ ಸುದ್ದಿ) ಎಂದು ಮಸಿ ಬಳಿದಿದ್ದಾರೆ. ಮಾನಹಾನಿ ಕೇಸುಗಳನ್ನು ಜಡಿಯುವ, ಪ್ರಸಾರ ಪರವಾನಗಿಗಳನ್ನು ರದ್ದು ಮಾಡುವ, ಅಪನಿಂದೆ-ಮಾನಹಾನಿ ಕಾನೂನುಗಳನ್ನು ಬದಲಾಯಿಸುವ ಬೆದರಿಕೆಗಳನ್ನು ಹಾಕುತ್ತಿರುತ್ತಾರೆ. ಪತ್ರಿಕೆಗಳನ್ನು ಶತ್ರುಗಳು ಎಂದು ಕರೆಯುವ ವಿಶ್ವದ ನಾನಾ ಸರ್ವಾಧಿಕಾರಿಗಳ ಪೈಕಿ ಟ್ರಂಪ್ ಮೊದಲನೆಯವರೂ ಅಲ್ಲ ಕೊನೆಯವರೂ ಆಗುವುದಿಲ್ಲ.

ಅವರ ದಾಳಿ ಕೇವಲ ಪತ್ರಿಕಾ ಮಾಧ್ಯಮಗಳಿಗೆ ಸೀಮಿತ ಅಲ್ಲ. ವಲಸೆ ಬಂದವರು, ಆಫ್ರಿಕನ್-ಅಮೆರಿಕನ್ನರು, ಲ್ಯಾಟಿನೋಗಳು, ಮಹಿಳೆಯರು, ಮುಸಲ್ಮಾನರು, ನ್ಯಾಯಾಧೀಶರು, ಪರಿಸರವಾದಿಗಳು ಹೀಗೆ ತಮ್ಮನ್ನು ಪ್ರಶ್ನಿಸುವ ಯಾರೇ ಆದರೂ ಅವರ ಮೇಲೆ ಎರಗಿದ್ದಾರೆ. "ಸಮೂಹ ಮಾಧ್ಯಮಗಳ ಶತ್ರುಗಳನ್ನು ಎಂದೆಂದಿಗೂ ಕೊಲ್ಲಲಾರೆ, ದ್ವೇಷಿಸುತ್ತೇನೆ," ಎಂದು ಸಾರ್ವಜನಿಕ ಸಭೆಗಳಲ್ಲಿ ಅಬ್ಬರಿಸುತ್ತಾರೆ. ಅವರ ಅಂಧ ಬೆಂಬಲಿಗರು ಅದೇ ಸಾರ್ವಜನಿಕ ಸಭೆಗಳಲ್ಲಿ ಪತ್ರಕರ್ತರ ವಿರುದ್ಧ ಕ್ರೋಧತಪ್ತರಾಗಿ ಮುಷ್ಠಿ ಬಿಗಿಯುತ್ತಾರೆ, ಬೈಗಳನ್ನು ಕಿರುಚುತ್ತಾರೆ, ಬೆದರಿಕೆ ಹಾಕುತ್ತಾರೆ.

Image
Narendra Modi
ಪ್ರಧಾನಿ ನರೇಂದ್ರ ಮೋದಿ

ಮೇಲಿನ ಈ ಎಲ್ಲ ಕಥನ ಸಮಕಾಲೀನ ಭಾರತೀಯ ಸಂದರ್ಭಕ್ಕೆ ಪರಿಚಿತ ಎನಿಸಿದ್ದರೆ ಆಶ್ಚರ್ಯವಿಲ್ಲ. ವ್ಯತ್ಯಾಸ ಇಷ್ಟೇ- ಅಲ್ಲಿ ಪತ್ರಿಕಾ ಸ್ವಾತಂತ್ರ್ಯ ಸಂವಿಧಾನದತ್ತ. ಇಲ್ಲಿ ವಾಕ್ ಸ್ವಾತಂತ್ರ್ಯದ ಮರೆಯಲ್ಲಿ ಅಡಕ. ಅಲ್ಲಿನ ನಿರ್ಭೀತ ಮಾಧ್ಯಮಗಳು ಮಂಡಿ ಊರುವುದಿಲ್ಲ. ಇಲ್ಲಿ ಭಟ್ಟಂಗಿತನದ ರಸ ತೊಟ್ಟಿಕ್ಕಿಸುತ್ತವೆ. ಅಲ್ಲಿ ಬಾಯಿ ತೆರೆದು ಆಡಿದ ಮಾತುಗಳಿವೆ, ಇಲ್ಲಿ ಒಡಲಲ್ಲೇ ಇರಿಸಿಕೊಂಡ ಹಗೆಯ ಹೊಗೆಯಿದೆ. ಕಳೆದ ಹಲವು ವರ್ಷಗಳಿಂದ ಬಿತ್ತಿ ಬೆಳೆಸಿದ ಅಸಹನೆಯ ನಂಜಿನ ಫಸಲು ಗೌರಿ ಲಂಕೇಶ್ ಅಂತಹ ಪತ್ರಕರ್ತರ ಪ್ರಾಣ ಬಲಿ ಪಡೆದಿದೆ. ಬಹುತ್ವದ ಸಮಾಜವನ್ನು ಬಯಸುವ ಸಾವಿರಾರು ಪತ್ರಕರ್ತರನ್ನು ಭೀತಿ ಮತ್ತು ಚಾರಿತ್ರ್ಯವಧೆಯ ಕರಿನೆರಳಿಗೆ ನೂಕಿದೆ.

ನಮ್ಮಲ್ಲಿ ಪತ್ರಿಕಾ ಸ್ವಾತಂತ್ರ್ಯಕ್ಕೆ ಬದ್ಧ ಎಂದು ಬಹಿರಂಗವಾಗಿ ಸಾರುವ ಸರ್ಕಾರವಿದೆ. ತನ್ನ ತಪ್ಪು ತಡೆಗಳನ್ನು, ಅಪದ್ಧ ಆತ್ಮರತಿಯನ್ನು ಪ್ರಶ್ನೆ ಮಾಡುವ ಮಾಧ್ಯಮ ಸಂಸ್ಥೆಗಳನ್ನು 'ದಾರಿಗೆ ತರಲು' ದಂಡ ಪ್ರಯೋಗದ ತನ್ನದೇ ವಿನೂತನ ವಿಧಾನಗಳನ್ನು ಹೊಂದಿದೆ.

ಆಳುವ ಪಕ್ಷದ ಮಡಿಲಲ್ಲಿ ಆಡುವ ಮುದ್ದಿನ ನಾಯಿಗಳು

ಆಳುವವರಿಗೆ ಕಿರಿಕಿರಿ ಎನಿಸುವ ವ್ಯಕ್ತಿಗಳು, ಸಂಸ್ಥೆಗಳ ಪಾಲಿಗೆ ಸುದ್ದಿವಾಹಿನಿಗಳು, ಪತ್ರಿಕೆಗಳು ಟ್ರೋಲ್‌ಗಳಾಗುತ್ತಿವೆ. ಪತ್ರಿಕೋದ್ಯಮದಲ್ಲಿ ವಸ್ತುನಿಷ್ಠತೆ ಎಂಬ ಮೌಲ್ಯ ಅತಿ ಹೆಚ್ಚು ಹತ್ಯೆಯಾಗಿದೆ. ಬಹುತೇಕ ಮೀಡಿಯಾ ಇಂದು ಲಾಭಬಡುಕ ಕಾರ್ಪೊರೆಟ್‌ಗಳು ಮತ್ತು ಅಧಿಕಾರದ ಹಪಾಹಪಿಯ ರಾಜಕೀಯ ಹಿತಾಸಕ್ತ ಶಕ್ತಿಗಳ ಕೈಯಲ್ಲಿನ ಅಸ್ತ್ರವಾಗತೊಡಗಿದೆ. ಅಧಿಕಾರಸ್ಥರನ್ನು ಬಲಿಪಶುವಿನಂತೆ ಚಿತ್ರಿಸಲಾಗುತ್ತಿದೆ. ಮುಖ್ಯಧಾರೆಯ ಹಲವು ಸುದ್ದಿವಾಹಿನಿಗಳು ದೇಶದ ಬಹುದೊಡ್ಡ ಕಾರ್ಪೊರೆಟ್ ಕಂಪನಿಗಳಿಂದ, ಇಲ್ಲವೇ ಅವುಗಳ ಪಾಲುದಾರರಿಂದ ಸಾಲ ರೂಪದ ಆರ್ಥಿಕ ನೆರವು ಪಡೆದಿರುವ ವರದಿಗಳಿವೆ. ಬಹುತೇಕ ಸಮೂಹ ಮಾಧ್ಯಮಗಳು ಸರ್ಕಾರ ಮತ್ತು ಆಡಳಿತ ಪಕ್ಷವನ್ನು ಪ್ರಶ್ನಿಸುವ ಬದಲು ಪ್ರತಿಪಕ್ಷಗಳ ಬೇಟೆಯಾಡುವ ವಿಪರ್ಯಾಸ ಜರುಗಿದೆ.

ಪತ್ರಿಕಾಗೋಷ್ಠಿಯನ್ನೇ ನಡೆಸದ ಪ್ರಧಾನಿಯವರು, ದೀಪಾವಳಿ ಮಂಗಳ ಮಿಲನಕ್ಕೆ ಪತ್ರಕರ್ತರನ್ನು ಕರೆಯುತ್ತಾರೆ. ಪ್ರಶ್ನೆ ಕೇಳುವ ತಮ್ಮ ಕಸುಬನ್ನು ಮರೆತಿರುವ ಪತ್ರಕರ್ತರು, ಪ್ರಧಾನಿ ಜೊತೆ ಸೆಲ್ಫಿ ತೆಗೆಸಿಕೊಳ್ಳಲು ಒಬ್ಬರ ಮೈಮೇಲೆ ಮತ್ತೊಬ್ಬರು ಬಿದ್ದು ತಹತಹಿಸುತ್ತಾರೆ!

ನಿಮಗೆ ಏನು ಅನ್ನಿಸ್ತು?
0 ವೋಟ್