ಗೂಗಲ್ ಡ್ರೈವ್ನಲ್ಲಿ ಸಣ್ಣ ವಯಸ್ಸಿನ ಬೆತ್ತಲೆ ಚಿತ್ರವನ್ನು ಅಪ್ಲೋಡ್ ಮಾಡಿದ್ದಕ್ಕಾಗಿ ಕಳೆದ ಒಂದು ವರ್ಷದಿಂದ ಇಮೇಲ್ ಖಾತೆಯನ್ನು ಗೂಗಲ್ ಸಂಸ್ಥೆ ನಿರ್ಬಂಧಿಸಿದ್ದ ಕ್ರಮವನ್ನು ಪ್ರಶ್ನಿಸಿ ವ್ಯಕ್ತಿಯೊಬ್ಬರು ಗುಜರಾತ್ ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ.
ಅರ್ಜಿದಾರರ ಜಿಮೇಲ್ ನಿರ್ಬಂಧಿಸಿದ ಕಾರಣ ಕೇಳಿ ಗುಜರಾತ್ ಹೈಕೋರ್ಟ್, ಗೂಗಲ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಕಂಪನಿಗೆ ನೋಟಿಸ್ ಜಾರಿ ಮಾಡಿದೆ. ಒಂದು ವರ್ಷದ ಹಿಂದೆ ಅರ್ಜಿದಾರರು ಎರಡು ವರ್ಷದ ಮಗುವಿದ್ದಾಗ ಅವರ ಅಜ್ಜಿ ಸ್ನಾನ ಮಾಡಿಸುತ್ತಿದ್ದ ಭಾವಚಿತ್ರವನ್ನು ಅಪ್ಲೋಡ್ ಮಾಡಿದ್ದಕ್ಕೆ ‘ಮಕ್ಕಳ ಶೋಷಣೆ’ ಕಾರಣದಡಿ ಅವರ ಜಿಮೇಲ್ ಖಾತೆಯನ್ನು ನಿರ್ಬಂಧಿಸಲಾಗಿತ್ತು.
ಗುಜರಾತ್ ಹೈಕೋರ್ಟ್ ನ್ಯಾಯಮೂರ್ತಿ ವೈಭವಿ ಡಿ ನಾನಾವತಿ ಅವರು ಮಾ.15ರಂದು ಗೂಗಲ್, ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಗೆ ನೋಟಿಸ್ ಜಾರಿಗೊಳಿಸಿ ಮಾ.26ರೊಳಗೆ ಉತ್ತರಿಸುವಂತೆ ನಿರ್ದೇಶಿಸಿದೆ.
ಅರ್ಜಿದಾರ ನೀಲ್ ಶುಕ್ಲಾ ಕಂಪ್ಯೂಟರ್ ಇಂಜಿನಿಯರ್ ಆಗಿದ್ದು, ತಾವು ಚಿಕ್ಕ ಮಗುವಿದ್ದಾಗ ತಮ್ಮ ಅಜ್ಜಿ ಸ್ನಾನ ಮಾಡಿಸುತ್ತಿದ್ದ ಫೋಟೊ ಸೇರಿದಂತೆ ಸಣ್ಣ ವಯಸ್ಸಿನ ಫೋಟೊವನ್ನು ಒಂದು ವರ್ಷದ ಹಿಂದೆ ಗೂಗಲ್ ಡ್ರೈವ್ನಲ್ಲಿ ಅಪ್ಲೋಡ್ ಮಾಡಿದ್ದರು.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಹೇಳುವುದು ಹಬ್ಬ, ಮಾಡುವುದು ಯುದ್ಧ, ಸಾಯುವುದು ಸೈನಿಕರು
ಇದೇ ಕಾರಣಕ್ಕಾಗಿ ಶುಕ್ಲಾ ಅವರ ಜಿಮೇಲ್ ಖಾತೆಯನ್ನು ಕಳೆದ ವರ್ಷದ ಏಪ್ರಿಲ್ನಲ್ಲಿ ಮಕ್ಕಳ ಶೋಷಣೆ ವಿಷಯಕ್ಕೆ ಸಂಬಂಧಿಸಿದ ಉಲ್ಲಂಘನೆಯ ನಿಯಮದಡಿ ನಿರ್ಬಂಧಿಸಿದೆ ಎಂದು ಕೋರ್ಟ್ಗೆ ಶುಕ್ಲಾ ಅವರ ವಕೀಲರಾದ ದೀಪೆನ್ ದೇಸಾಯಿ ತಿಳಿಸಿದರು.
ಗೂಗಲ್ನ ಕುಂದುಕೊರತೆ ಪರಿಹಾರ ಕಾರ್ಯವಿಧಾನ ವಿಭಾಗ ಕೂಡ ಸಮಸ್ಯೆಯನ್ನು ಪರಿಹರಿಸದ ಕಾರಣ ಮಾ.12 ರಂದು ಹೈಕೋರ್ಟ್ ಮೆಟ್ಟಿಲೇರಿದ್ದರು.
ಗೂಗಲ್ ತಮ್ಮ ಅರ್ಜಿದಾರರ ಜಿಮೇಲ್ ಖಾತೆಯನ್ನು ನಿರ್ಬಂಧಿಸಿರುವ ಕಾರಣ ಶುಕ್ಲಾ ಅವರು ತಮ್ಮ ಇಮೇಲ್ಗಳನ್ನು ಪರಿಶೀಲಿಸಲು ಸಾಧ್ಯವಾಗುತ್ತಿಲ್ಲ. ಇದರಿಂದ ತಮ್ಮ ಹಲವು ವ್ಯವಹಾರಗಳನ್ನು ನಷ್ಟ ಮಾಡಿಕೊಳ್ಳುತ್ತಿದ್ದಾರೆ ಎಂದು ವಕೀಲರು ಕೋರ್ಟ್ಗೆ ಮಾಹಿತಿ ನೀಡಿದರು.
ಶುಕ್ಲಾ ಅವರು ತಮ್ಮ ಸಮಸ್ಯೆ ಪರಿಹರಿಸಲು ಗುಜರಾತ್ ಪೊಲೀಸ್ ಹಾಗೂ ನೋಡಲ್ ಏಜನ್ಸಿ ಆಗಿರುವ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಗೆ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗದ ಕಾರಣ ನ್ಯಾಯಾಂಗದ ಮೊರೆ ಹೋಗಿದ್ದಾರೆ.