ಥೈಲ್ಯಾಂಡ್, ಶ್ರೀಲಂಕಾ ದೇಶಗಳ ನಂತರ ಈಗ ಮಲೇಷ್ಯಾ ಕೂಡ ಭಾರತೀಯರಿಗೆ ವೀಸಾ ಮುಕ್ತ ಪ್ರವೇಶಕ್ಕೆ ಅನುಮತಿ ನೀಡಿದೆ. ಡಿಸೆಂಬರ್ 1 ರಿಂದ ಭಾರತ ಮತ್ತು ಚೀನಾದ ನಾಗರಿಕರಿಗೆ 30 ದಿನಗಳ ವೀಸಾ-ಮುಕ್ತ ಪ್ರವೇಶ ನೀಡಲು ಪ್ರಾರಂಭಿಸಿದೆ.
ಈ ಬಗ್ಗೆ ಮಾಹಿತಿ ನೀಡಿದ ಮಲೇಷ್ಯಾ ಪ್ರಧಾನಿ ಅನ್ವರ್ ಇಬ್ರಾಹಿಂ, ಟರ್ಕಿ ಮತ್ತು ಜೋರ್ಡಾನ್ ಸೇರಿದಂತೆ ಗಲ್ಫ್ ರಾಷ್ಟ್ರಗಳು ಮತ್ತು ಇತರ ಪಶ್ಚಿಮ ಏಷ್ಯಾದ ದೇಶಗಳ ಪ್ರಜೆಗಳಿಗೆ ಈಗಾಗಲೇ ವೀಸಾ ವಿನಾಯಿತಿ ನೀಡಲಾಗಿದ್ದು, ಈಗ ಭಾರತ ಮತ್ತು ಚೀನಾವನ್ನು ಸೇರ್ಪಡೆಗೊಳಿಸಲಾಗಿದೆ ಎಂದು ತಿಳಿಸಿದರು.
“ಆದಾಗ್ಯೂ, ವೀಸಾ ವಿನಾಯಿತಿಯು ಉನ್ನತ ಭದ್ರತಾ ಪರಿಶೀಲನೆಯನ್ನು ಒಳಪಟ್ಟಿರುತ್ತದೆ. ಮಲೇಷ್ಯಾಕ್ಕೆ ಭೇಟಿ ನೀಡುವ ಎಲ್ಲ ಪ್ರವಾಸಿಗರಿಗೆ ಪ್ರಾಥಮಿಕ ಪರಿಶೀಲನೆಗಳನ್ನು ನಡೆಸಲಾಗುವುದು. ಭದ್ರತೆಗೆ ಒಳಪಟ್ಟಂತೆ ಕ್ರಿಮಿನಲ್ ದಾಖಲೆಗಳು ಅಥವಾ ಭಯೋತ್ಪಾದನೆಯ ಅಪಾಯವಿದ್ದರೆ, ಅಂತಹವರನ್ನು ದೇಶದೊಳಗೆ ಪ್ರವೇಶಿಸಲು ಅನುಮತಿಸಲಾಗುವುದಿಲ್ಲ. ಇದು ಭದ್ರತಾ ಪಡೆಗಳು ಮತ್ತು ವಲಸೆಯ ಅಧಿಕಾರದ ಅಡಿಯಲ್ಲಿ ಬರುತ್ತದೆ ”ಎಂದು ಪ್ರಧಾನಿ ಹೇಳಿದರು.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಉರಿಯುತ್ತಿರುವ ಬಿಜೆಪಿಯಲ್ಲಿ ಗಳ ಇರಿಯುತ್ತಿರುವ ನಾಯಕರು
ಸಾಮಾಜಿಕ ಭೇಟಿಗಳು, ಪ್ರವಾಸೋದ್ಯಮ ಮತ್ತು ವ್ಯಾಪಾರದ ಉದ್ದೇಶಕ್ಕಾಗಿ 30 ದಿನಗಳ ವೀಸಾ ಮುಕ್ತ ಪ್ರವೇಶವನ್ನು ಪ್ರಸ್ತುತ ಎಂಟು ಆಸಿಯಾನ್ ದೇಶಗಳು ನೀಡುತ್ತಿವೆ.
ಮಲೇಷ್ಯಾವು ಪ್ರಸ್ತುತ 16.1 ಮಿಲಿಯನ್ ರಿಂಗಿಟ್(ಚಲಾವಣೆಯ ನಾಣ್ಯ) ಪ್ರವಾಸೋದ್ಯಮ ಉದ್ಯಮ ಹೊಂದಿದ್ದು, ಮುಂದಿನ ದಿನಗಳಲ್ಲಿ ಅಂತಾರಾಷ್ಟ್ರೀಯ ಪ್ರವಾಸಿಗರ ಆಗಮನದಿಂದ 49.3 ಬಿಲಿಯನ್ ರಿಂಗಿಟ್ ಉದ್ಯಮವನ್ನು ಗುರಿಯಾಗಿಸಿಕೊಂಡಿದೆ.
ಮಲೇಷ್ಯಾಕ್ಕೆ ಆಗಮಿಸುವ ಪ್ರವಾಸಿಗ ಅಗ್ರ ರಾಷ್ಟ್ರಗಳಲ್ಲಿ ಭಾರತವು ಒಂದಾಗಿದ್ದು, 2022 ರಲ್ಲಿ, ಒಟ್ಟು 3,24,548 ಭಾರತೀಯ ಪ್ರವಾಸಿಗರು ಮಲೇಷ್ಯಾಕ್ಕೆ ಭೇಟಿ ನೀಡಿದ್ದರು. 2023 ರ ಮೊದಲ ಎರಡು ತ್ರೈಮಾಸಿಕದಲ್ಲಿ, ಮಲೇಷ್ಯಾಕ್ಕೆ 1,64,566 ಭಾರತೀಯರು ಭೇಟಿ ನೀಡಿದ್ದಾರೆ.