ಅಡುಗೆ ಸಾಮಗ್ರಿಗಳ ಬೆಲೆ ಗಗನಕ್ಕೇರುತ್ತಿದೆ. ಕಳೆದ ಎರಡು ತಿಂಗಳಿನಿಂದ ಟೊಮೆಟೊ ಬೆಲೆಯಲ್ಲಿ ಭಾರೀ ಏರಿಕೆಯಾಗಿದೆ. ಕೆ.ಜಿ ಟೊಮೆಟೊ 120ರಿಂದ 140 ರೂ.ಗೆ ಮಾರಾಟವಾಗುತ್ತಿದೆ. ದುಬಾರಿ ಬೆಲೆಯ ಸಂದರ್ಭದಲ್ಲಿ ಟೊಮೆಟೊ ಬೆಳೆದಿದ್ದ ಆಂಧ್ರಪ್ರದೇಶದ ರೈತರೊಬ್ಬರು ಒಂದೂವರೆ ತಿಂಗಳಿನಲ್ಲಿ (45 ದಿನ) ಬರೋಬ್ಬರಿಗೆ 4 ಕೋಟಿ ರೂ. ಲಾಭ ಪಡೆದಿದ್ದಾರೆ.
ಆಂಧ್ರದ ಚಿತ್ತೂರು ಜಿಲ್ಲೆಯ ರೈತ ಮುರುಳಿ ಅವರು ತಮ್ಮ 22 ಎಕರೆ ಜಮೀನಿನಲ್ಲಿ ಟೊಮೆಟೊ ಬೆಳೆದಿದ್ದು, 130 ಕಿ.ಮೀ. ದೂರದಲ್ಲಿರುವ ಕೋಲಾರ ಎಪಿಎಂಸಿಯಲ್ಲಿ ಉತ್ತಮ ಬೆಲೆ ಸಿಗುತ್ತದೆಯೆಂದು ಇಲ್ಲಿಗೆ ತಂದು ಮಾರಾಟ ಮಾಡುತ್ತಿದ್ದಾರೆ. 45 ದಿನಗಳಿಂದ ಆಗಾಗ್ಗೆ ಟೊಮೆಟೊ ಕಠಾವು ಮಾಡಿ, ಮಾರಾಟ ಮಾಡಿರುವ ಅವರು ಬರೋಬ್ಬರಿ 4 ಕೋಟಿ ರೂ. ಲಾಭ ಪಡೆದಿದ್ದಾರೆ.
“ಕಳೆದ ಎಂಟು ವರ್ಷಗಳಿಂದ ಟೊಮೆಟೊ ಬೆಳೆಯುತ್ತಿದ್ದೇನೆ. ಆದರೆ, ಎಂದೂ ಅಂತಹ ಲಾಭ ಪಡೆದಿರಲಿಲ್ಲ. ಈಗ ಉತ್ತಮ ಲಾಭ ಬಂದಿದೆ” ಎಂದು ರೈತ ಮುರುಳಿ ಹೇಳಿದ್ದಾರೆ.
“ಕಳೆದ ವರ್ಷ ಜುಲೈನಲ್ಲಿ ಬೆಲೆ ಕುಸಿತದಿಂದಾಗಿ ಭಾರಿ ನಷ್ಟವನ್ನು ಅನುಭವಿಸಿದ್ದೆವು. ಬೀಜ, ರಸಗೊಬ್ಬರ, ಕೂಲಿ, ಸಾಗಾಣಿಕೆ ಮತ್ತಿತರ ವೆಚ್ಚಗಳಿಂದಾಗಿ 1.5 ಕೋಟಿ ರೂ. ಸಾಲಕ್ಕೆ ಸಿಲುಕಿದ್ದೆವು. ಅಲ್ಲದೆ, ತಮ್ಮ ಗ್ರಾಮದಲ್ಲಿ ಸರಿಯಾದ ವಿದ್ಯುತ್ ಪೂರೈಕೆ ಇಲ್ಲದ ಕಾರಣ, ಇಳುವರಿಯೂ ಕುಸಿದಿತ್ತು” ಎಂದು ಅವರು ಹೇಳಿಕೊಂಡಿದ್ದಾರೆ.
“ಈ ಬಾರಿ ಅಧಿಕಾರದ ಪರಿಸ್ಥಿತಿ ಬದಲಾಗಿದೆ. ಉತ್ತಮ ಬೆಳೆ ಬಂದಿದೆ. ಇದುವರೆಗೆ 35 ಬಾರಿ ಟೊಮೆಟೊ ಕಟಾವು ಮಾಡಿದ್ದೇವೆ. ಇನ್ನೂ ಸುಮಾರು 15 ಬಾರಿ ಕಟಾವು ಮಾಡುವ ಸಾಧ್ಯತೆ ಇದೆ. 45 ದಿನಗಳಲ್ಲಿ ಇದ್ದ ಸಾಲವನ್ನೆಲ್ಲ ತೀರಿಸಿ, 2 ಕೋಟಿ ರೂ. ಉಳಿತಾಯ ಲಾಭ ಪಡೆದಿದ್ದೇವೆ” ಎಂದು ಅವರು ಹೇಳಿದ್ದಾರೆ.
ಲಾಭದ ಹಣದಲ್ಲಿ ಮತ್ತಷ್ಟು ಭೂಮಿ ಖರೀದಿಸಲು ಯೋಜಿಸುತ್ತಿದ್ದಾರೆ. ದೊಡ್ಡ ಪ್ರಮಾಣದಲ್ಲಿ ತೋಟಗಾರಿಕೆ ಕೃಷಿ ಮಾಡುವ ಚಿಂತನೆಯಲ್ಲಿದ್ದಾರೆ. ಕೃಷಿಯನ್ನು ನಂಬುವ ಮತ್ತು ಗೌರವಿಸುವವನು ಎಂದಿಗೂ ಎದೆಗುಂದ ಬಾರದು, ಒಂದೊಮ್ಮೆ ಕೃಷಿ ನಮ್ಮ ಕೈಹಿಡಿಯುತ್ತದೆ ಎಂದು ಅವರು ಹೇಳುತ್ತಾರೆ.